الي التلفزيون المصري .. اللي اختشو ماتو في الثوره

مقال كتبته من بعد الثوره كده وقولت بلاش انشره ع المدونه 

وقولت نفتح صفحه جديده مع التلفزيون المصري 

بس واضح انه مصمم ينافق اي حد موجود علي كرسي الحكم 

ده سبب 

السبب التاني 

نفسي الناس بتوع سوريا والبلاد العربيه يتعلمو من اللي حصل معانا 

نفسي حاشية الرؤساء يبطلو نفاق وغباء ويعرفو انهم هيموتو وربنا هيسألهم عن دم اخواتهم اللي ضاع تحت رجليهم وهما فرحانيين بكلب فعلا واسد اسما 

بسم الله الرحمن الرحيم


هتكلم النهارده عن الاعلام المصري بشكل عام
ولما اقول الاعلام المصري في ناس كتير هتفتكر ان انا هتكلم عن التلفزيون
لاء
هتكلم عن نقطتين مهمين جدا
اول نقطه : ماسبيرو الذي أبهر العالم بالخداع والكذب
تاني نقطه : شبكة رصد التي أبهرت العالم بالاخبار الحقيقيه


هنتكلم الاول عن التلفزيون المصري التابع للنظام حين ذاك
طبعا كلكم شوفتو وتابعتو
عن نفسي كنت وانا بقلب في التلفزيون كنت بعدي علي قنوات النيل عشان اضحك مش اكتر
فــ في أول أربع ايام ما شاء الله
الدنيا كانت مولعه وهما ما شاء الله جايبين صورة النيل ومفيش حد في الشارع
زي ما يكون المظاهرات هتطلع من النيل
هتطلع من الميه وهما مستنيين يخدوها حصري
وخد عندك بئا الاخبار الكذب
والتضليل
واستخدام بعض المشاهير لجذب تعاطف الشعب مع النظام
من المشاهير دي بعضهم اللي كان عارف انه بيكذب وداخل يستفز الناس
وبعضهم كان مضلل لانه مكنش بيشوف الا التلفزيون المصري
ولكن في الحالتين ميتسماش ده الا ( غباء فكري )

انا امي كانت بالنهار بتقعد عن سيدي الله يرحمه قبل ما يموت ويتفرجو ع التلفزيون المصري
فتييجي لما تلاقيني بتكلم عن الثوره تتخانق معايا وانتو هتضيعو البلد ومش عارف ايه
ولما تقعد تتفرج معايا ع الجزيره او افرجها علي فيديوهات من علي يوتيوب
تغير رائيها 180 درجه وتقول التلفزيون ده بيضلل الناس ليه كده
تييجي تاني يوم
تروح عند سيدي وتتفرج ع التلفزيون ومش عارف ايه ونفس القصه تحصل كل يوم

فالتلفزيون المصري قام بحرب أسف في اللفظ ( وسخه ) ضد الثوره
واستغل ان الطبقه الاكبر في مصر من الناس الطيبه البسيطه وابتدا يلعب علي مشاعرهم

ولما وقع مبارك
والله
والله
والله
عمري ما انسي اللحظه دي
يدوبك عمر سليمان كان بيقول خطاب التنحي وكنت انا في اللحظه دي بقلب ووقفت ع المصريه
بعد ما قال التنحي
قام التلفزيون في لحظه
جايب ميدان التحرير وجايب شوارع مصر والناس بتجري وفرحان
ومشغل اغاني بئا وهايص
كنت ساعتها بدمع من التاريخ اللي بيحصل ده
بس كنت بضحك علي سذاجة الناس دي بجد
التلفزيون أبهر العالم وعلم العالم معني التضليل

وفي ناس بقت تقول ما احنا مكناش عارفين وكنا متضللين !!
طب يا جماعه هو يعني كنتو هتخترعو الذره لما تعرفو الحقيقه
ده واقع وبيحصل
يقولو الجزيره كدابه
طب يعني هي بتجيب صور من الصومال يعني ولا ايه؟


نييجي للاعلام المحترم
بغض النظر عن الجزيره مش هتكلم عنها لان بصراحه وانا شايف انها تتحدث عن نفسها

هتكلم عن نموذج مصري أفتخر بيه كشاب مصري

شبكة رصد
كلنا طبعا شفنا شبكة رصد علي الفيس بوك
يوم 26 يناير صحيت من النوم عايز اعرف ايه اللي بيحصل
والتلفزيون طبعا مشغل افلام ومفيش في دماغه اي حاجه
كتبت في جوجل اخبار مصر حالا وحجات كده
لقيت موقع لسه جديد لانج اسمه شبكة رصد
دخلت عليه لقيته لسه لانج
لقيت صفحه ليهم ع الفيس بوك ضغط عليها وخشيت
لقيت عليها اخبار كتييييييييييييير لحظه بلحظه
اول ما عملت لايك كانت الصفحه لا تعدي الــ 4000 ميمبر
علي ما قريت الاخبار كلها وعملت ريفرش للصفحه عشان الاخبار الجديده
لقيت الصفحه زادت 10.000 فانز
وهكذا
كل ما اعمل ريفرش الاقي اكثر من 10.000 فانز زادو
والصفحه انتشرت بسرعه جدا
وجم في عز الثوره قالو شبكة رصد عميله ومهييش من مصر زي ما كانو بيقولو علي جروب خالد سعيد

ولكن بعد كام يوم ظهر فريق شبكة رصد
والشباب اللي عملوها
كلهم طلبه جامعيين
معظمهم اللي نفذو الفكره من جامعة المنصوره
ثم اصحابهم من كل محافظه كانو بينقلولهم الصور والاخبار من هناك
وبكده شبكة رصد كانت هي المصدر الوحيد للاخبار
حتي الجزيره كانت بتاخد منهم اخبار عشان اللي تعرضت ليه الجزيره مكنش شويه

والايام دي بجد كنت فخور بالشباب دي
انهم عملو شئ من لا شئ
لكن كان شئ خرافي
وشئ هيحسب ليهم في التاااااريخ


شكرا شبكة رصد
هارد لك تلفزيون النظام السابق وانسي ان حد يرجع يشوفك