فوق سطح القمر






التليفون بيرن ,
-         ألو , ايوه يا ماما
الام : انت فين ؟
-         علي صوتك شويه الهوا شديد
الام : بقولك انت فين ؟
-         انا , انا فوق سطح القمر
الام : نهار اسود , قمر ..!
-         اه
الام : يا سيد يا سيد إلحق ابنك طلع ع القمر

الاب : قمر ..! هاتي كده , انت فين يا ابن الهبله ؟
-         ايه يا بابا والله فوق سطح القمر
الاب : و طلعت ازاي ؟ اكيد بالخازوق اللي خدته في الامتحانات صح ؟
-         علي صوتك يا حج الهوا شديد
الاب : هوا ايـه اللي فوق القمر يا عــ ,,, بيط ؟
-         طب بقولك ايه يا حج هكلمك اما انزل
الاب : وهتنزل امتي ان شاء الله ؟
-         ربـع ساعه وهتلاقيني قدامك



يشيل الاب التليفون من علي ودانه ويرميه قدام مراته : خدي كلمي الواد ده وقوليلو يجيب العشا وييجي يا اما هنفخه

الام : يا ابني انت فين ؟
-         ع السلم اهوه
الام : السلم بتاعنا ؟
-         لاء سلم القمر
الام : انت هتجننا يا ابني هو القمر ليه سلم
-         خلاص خلاص انا قدام شقة القمر اهوه , هخلص مصلحتي وجاي علي طول
الام : يا سيد إلحقني هينقطني , هو القمر عليه شقق كمان ؟
-         قمر ايـه اللي انتي وبابا طالعنلي بيه ده ؟
الام : مش بتقول انت ع القمر ؟
-         لاء انا بتكلم عن القمر بتاعي اللي انتو مرضتوش تخلوني اخطبها , وديني لأربيلكو السليمه لحد ما توافقوووو .








إرسال تعليق
مازلت عايش في الحياه بكيفي