الضحكه غلبتني وحاصرتني وخلتني برغم الحزن أستسلم لبسمه طالعه بمشقه في موجة غم ماليه الكون
وصـوت قلبي بدمع عنيا كان معجون , بنادي واقول يا مين يحمي ولادك
يا مين يسلمهم , يا مين ياخد عزيزك اللي قال حامي واصلا كان مسممهم
وغضبي رغم أحزاني محاوطه ولسه ممتلكه
يا مين زعلان لـ زعلهم يلوم واحد كان قادر يسد سدود ما بين شياطين وولادهم
انا شايفك وداينك وشاهد يوم قيامتي انك سبب للموت
وعدت وقولت وعد الحر , سجنت الحر , وسبت العبد بينافقك بـكل برود
وشعب يخاف يقول ظـــالم , فالتزم السكوت
جندت في كلابك وعـُبادك ومشايخك وحـُراسك وناس تانيه معاك لله كده في الله
واول ما سهم اتهام يـتجه نـحوك توجهله كلابك او مشايخك يهوهوو علي راميه
ويـصبح صاحب الحق خاين ويترمي في سجنك يا اما لو ربك أمر يرجعلهم في تابوت
وانا مش بإيدي العمل , حتي الامل محروق , يائس , قرفان , وانا تعبان وبتحصر علي شبابي
وشباب بلدي اللي ماتـو سواء هنا ولا هناك القتل واحد , والجـُرم واحد
ان فيهم حتي واحد , قدر يخليهم يقولو الحق , في وش الظلم والإهمال
فـكان مهما اختلفت الاسباب , اتنفذ فيهم الإعدام
وانــا تعبان , انـــا قرفان وصوتي لسه بيعافر في حلقي لـيصرخ بكلمة صـدق
يـقول العدل , يدين الكـُفر , يساعد صوت واحد تاني لـيعلي ويـسمعه الحـكام
انا مـحصور وهتجنن , وبـصرخ من روايح مـُر
ورغم انها مش البدايـه ولا النهايـه , فلازم ابئا متحكم وصابر لقل ما نواصل ونوصل للي عايزينه , وشايفينه , وحالفين اننا نروحله ولـو حتي نموتله , نــكون راضيين
ورغم حزني , ورغم اني حزين
الضحكه غلبتني وحاصرتني وخلتني برغم الحزن أستسلم لبسمه طالعه بمشقه في موجة غم ماليه الكون
0 عايز تقول رائيك؟:
إرسال تعليق