حاسسها اتغيرت
ورجعت من بعيد
قلعت هدومها القديمه
ولبست فستان جديد
شايفها اتحررت
وبتجري من الفرح
بتبوس ايد المصاب
اللي عشانها انجرح
وزارت كل بيت وقالت لاهله انا جيت
ومن النهارده انا ملككم ده انا قبلكم ضحيت
وفي وسط فرحتها بحريتها علي جنب وقفت تترحم
علي كل شهيد
حاسسها اتغيرت .. ورجعت من بعيد
طلت زي الشمس تنور
كل مكان موجود جواها
خارجه توزع من خيراتها
وراحت زارت ناس كرهاها
قالت ليهم انتو حبايبي
سامحوني انا كنت مسافره
ارجعو وابكو جوه في حضني
ارجعو ليا تاني انا اسفه
وتعالو نبدء صفحه جديده
مليانه حب وعيشه سعيده
ده انا بنتكم
وجيتلكم
وبحبكم طبعا أكيد
حاسسها اتغيرت ,, ورجعت من بعيد
باست ايد امي وابويا
وقعدت تلعب ويا اخويا
وخرجت وقفت ويا جرانا
هما يزغرتو هي تغني
راحت القهوه اللي ع الناصيه
طلبت شاي وقعدت هاديه
واتلم شبابها حواليها
باست ايدهم باسو ايديها
وقالتلهم انا فرحانه بيكم
سامحوني كان غصبا عني
الحلوه اللي انا بكتب عنها
مش قصدي بنوته جميله
انا بقصد بكلامي بلادي
رجعت حره وفرحانا بينا
يا بلادي اهلا بيكي
اشتقنا جدا ليكي
يحمينا ربي ويحميكي
طول عمرك ام الدنيا
بإيدينا ورضي ربي عليكي
عودي يا بلدي تاني لوطنك
يوم ما رجعتي ده عندنا عيد
انتي مكانك جوه في قلبي
حبنا ليكي يوماتي بيزيد
بلدي يا روحي حبيبتي يا امي
انتي بكل الدنيا يا ناسي
عايز اعلي في صوتي كمان
عايز الناس تعرف احساسي
حاسسها اتغيرت ,, ورجعت من بعيد
قلعت هدومها القديمه ,, ولبست فستان جديد
شايفها اتحررت ,, وبتجري من الفرح
بتبوس ايد المصاب ,, اللي عشانها انجرح
.....
شارك
0 عايز تقول رائيك؟:
إرسال تعليق