عن الأمان وأشياء أخري

من أكتر الاسئلة اللي بترهق أي بني أدم هي الاسئلة اللي ليها علاقه بإنه يطمن ويتأكد من الطريق اللي هو ماشي فيه وانه مش هيلبس في الحيط او ان اساساً يكون في طريق ومايكونش ماشي في اللاشئ الي اللاشئ ..

ايه يخليك متأكد من اللي انت بتعمله ؟

بص يا صديقي , من وجهة نظري العمر اقصر من انك ماتعملش الحاجه اللي نفسك فيها ومرتاح لها طالما لم يثبت بالدليل القاطع فشلها او انها مش الخير ليك ..

لان مفيش طريق هتمشيه فعلاً الا وهايملاك في مرحلة ما الشك في الطريق نفسه او في اختيارك له او قرارك اللي خدته , اوقات كتير الحيرة في اتخاذ القرار او الاختيار بين اشياء مختلفه اصعب كتير جداً من انعدام الاختيارات اساساً ..

برضو ايه اللي يطمني للطريق اللي انا ماشي فيه ؟

مفيش , اه والله زي ما بقولك مفيش , مهو محدش اتطلع علي الغيب ولا علي حكمة ربنا عشان يعرف نتيجة اختياراته او نهاية الطريق اللي ماشي فيه عشان يطمن وهو ماشي ولكن كل اللي تقدر تعمله انك تعمل اللي مرتاح له او اللي مقتنع بيه وتحاول علي قد ما تقدر انك تاخد بأسباب نجاح اي فكرة بتعملها وتدعي ربنا مايخذلكش فيها .. مهو انت قدامك حاجه من اتنين , يا تجيب حد يقررلك كل شئ في حياتك ويعملك كل شئ في حياتك وتريح دماغك ولو حصل فشل تقعد تلوم عليه وعلي إجباره ليك علي اختيار الشئ الفاشل ده , او انك تشمر دراعاتك كده وتنشف شوية وتفضل تحاول وتضبش وتستعين بالله لحد ما ترسي علي بر .

ايوه يعني هرسي علي بر امتي ولا اساساً اعرف منين اني رسيت علي بر ؟

برضو مفيش حاجه في ايدك تقدر تعملها عشان تعرف ده , كل اللي في ايدك انك تحسبها وتتوكل , تعمل اللي مرتاح له وتعمل اللي بتحبه وتعمله بحب وبرضو تقول يارب ما يخذلكش ..

انا عارف ان الكلام ده غريب شوية علي فئة من الناس اللي حرفياً متمهدلهم كل الطرق اللي بيمشوا فيها من اول ما بيتولدوا لحد ما بيموتوا , وتعبهم في الحياة مش اكتر من تعب حياة طبيعي , لكن لا هما مابيعرفوش يناموا بالليل عشان مش عارفين يدبروا امور حياتهم الصغيره جداً ولا بيموتوا من احساسهم بالوحده وان محدش جنبهم ولا حاسس بيهم ولا بيفقدوا طاقتهم كل دقيقة علي التركيز في كل شئ في حياتهم والا هتبوظ منهم ومش هايعرفوا يقفوا علي رجليهم تاني , لان مفيش حد يمد ايديه ينجدهم من الغرق اللي هما فيه او ينجدهم من طريق بيخسروا كل يوم فيه مجهود بالدم عشان بس يعرفوا يمشوا حياتهم بأي طريقة .. لكن اللي ملوش حد في الدنيا دي هو اللي هايفهم الكلام ده كويس ..

مش شرط يكون ملوش حد موجود فعلاً ولكن ملوش حد يفهمه ملوش حد ينصحه ملوش حد يقترح عليه ويشاركه التفكير والحيرة والتنفيذ وحتي يشاركه خيبته في الفشل ..

الحياة من وجهة نظري اسهل مليون مرة من الوضع اللي احنا عايشينه , ولكن صعوبتها الموجوده مش بسبب انها صعبه بالعكس , دي مسئلة معقده جداً , لو كل واحد قعد يفكر مع نفسه ايه الحاجه اللي لو حصلت الحياة تبقي جنة بالنسبالي هيلاقي حجات بسيطه وتافهه جداً وقرارات لو كانت اتاخدت او مساندة لو كانت حصلت او حتي التربية اللي اترباها من اهله لو كانت اختلفت كانت الامور هتبقي لذيذة جداً , ولكن حكمة ربنا ولسبب ما لا نعلمه الحلو مابيكلمش ولازم يكون في حجات بسيطه تنغص علينا الحياة بل وتجعلها مستحيله اوقات ..

امبارح صديق ليا بعتلي رساله علي ماسنجر بيقول فيها : تفتكر الانتحار حل ؟

لقتني برد عليه وبقوله : يبدو كذلك ولكن المصيبة انه مايطلعش حل !

قالي طب واخرتها ؟

قولتله زي اولها , الجواب بيبان من عنوانه يا صديق .

يبدو الكلام مُحبط وكئيب وناس فاقده ويأسه وكاره الدنيا باللي فيها , لكن الغريب ان الكلام ده بين اتنين مابيعملوش حاجه في حياتهم غير الضحك والتفائل وكل شئ فيه ريحة حب الحياة , لكن الدنيا قاعده تدوس ع الوش وتدي شمال ويمين فـ طبيعي ومنطقي ان الانسان احياناً يفقد إتزانه او منطقي جداً انه يفقد إتزانه اول ما يفقد شغفه بالحياة ومايكونش عنده اي سبب للتمسك بالامل ..

نرجع تاني , وبعيداً عن كل الكلام ده , ايه اللي يخليني أطمن ؟

يا صديقي انت متخيل انت بتسأل عن ايه ؟ انت بتسأل عن أحد أكبر أسباب ان الانسان يعيش سعيد , انه مايخفش انه يطمن !

متخيل انها حاجه سهله وبسيطه كده !

عايز تطمن في ايه طيب ؟

علي مستقبلك ؟

شغلك ؟

لازم تبدء تدور علي شغل افضل من اول يوم ليك في شغلك الجديد انا مؤمن بده

ماتسيبش نفسك للانهيار والروتين .. وماتسيبش شغلك عموماً لانك للاسف مش في المجتمع السوي اللي تقدر فيه تاخد مواقف ويبقي عندك مبدء وتسيب شغل واتنين وتلاته وفي الاخر متلاقيش تاكل , زي مانا عملت كتير طبعاً وعرفت معني الغلطه دي !

طيب عايز اطمن علي صحتي النفسيه ! انا مش كويس انا متوتر دايماً انا بتعصب علي اتف الاشياء ؟

ايه اللي بيعصبك ؟ شوف ايه بيعصبك وحاول تحله ولو حد هو السبب في ده اتكلم معاه , اتكلم مرة واتنين وعشرة , وقوله انه بيخسرك , قوله انه بدون ما يقصد بيخوفك من نفسك قبل ما يخوفك منه , بيخوفك من الناس والتعامل مع الناس , اذا كان اقرب الناس بيتسبب لك في العصبيه والخوف والغضب ده كله اومال التعامل مع بقيت الناس هيسببلك ايه !

لو مش مستوعب اللي انتو فيه سيبه , اه والله سيبه , العمر اقصر من انك تضيعه في استنزاف روحك علي علاقه اياً كانت صداقه حب اخوة اي حاجه ..

احنا مش جايين الدنيا دي نقتل بعض معنوياً , ولا عارفين بعض عشان نخلص علي بعض ويبقي اسمنا بنحاول ! لاء اللي يستنزفك سيبه واقعد لوحدك حزين واتعب وكل الحجات اللي بتحس بيها وانت اساساً معاه دي روح حس بيها وانت لوحدك ع الاقل يمكن تصحي في يوم كويس , لوحدك برضو !

الخلاصة ..

مفيش حاجه تطمن غير ربنا ..

غير احساسك انك ليك قيمة في الدنيا دي واتخلقت لشئ هتعمله وهاتمشي اياً كان بقي انت عرفت ايه الشئ اللي اتخلقت عشانه ولا لسه !

مسيرك تعرف لو مكنش دلوقت هيبقي في الاخره بقي وعليك خير ..

الموضوع مش مستاهل حرقة دم ولا توتر ولا خوف ولا عدم امان ..

الامان في الله لوحده .