احنا ليه اتغيرنا ؟






حاسسها اتغيرت  قصيده كتبتها قبل تنحي مبارك بـ 7 ايام واترددت اني انشرها في اليوم ده وقعدت  أجادل في نفسي هل انشرها في الوقت ده ولا استني انشرها لما مبارك يتنحي ؟
قررت اني انشرها بعدها بيومين وده من منطلق إيماني ان مبارك هيتنحي هيتنحي وبجد كل كلمه فيها كتبتها بإيمان مني ان فعلا البلد دي اتغيرت خلاص
مكنش في بالي ساعتها اسقاط نظام ولا تنحي رئيس لاني كنت عارف ومتأكد ان ده هيحصل في الايام دي وفي وقت قصير جدا لان اللي شوفناه من النظام في اربع ايام بس بان انه نظام هش وضعيف
يوم السبت 29 يناير بليل فجر يوم الاحد كنت قاعد قدام الجزيره بتفرج علي الاحوال وفجأه سمعت الجامع اللي جنبنا بينده
( اصحو يا شباب .. البلطجيه ماليه الشوارع اصحو يا شباب .. انزلو احمو بلدكو )
في الاول اترددت اني انزل لاسباب اهمها :
ـ ايه اللي يضمني اني هنزل الاقي حد معايا في الشارع مش يمكن انزل لوحدي والاقي البلطجيه الكتير دول يستفردو بيا يقتلوني
ـ كنت متأكد ان كل الكلام ده مبالغ فيه لان مصدره هو تلفزيون النظام أن ذاكـ

فكرت اعمل ايه اعمل ايه .. قررت اني اروح اصحي ابويا عشان ينزل معايا نشوف ايه الحوار وبالفعل روحت صحيت ابويا ونزلنا انا وهو الشارع لقيت كل الناس في الشارع والوارع متقفله وكل مجموع مولعه نار والبلد متأمنه اوي يعني
قعدت في اليوم ده في الشارع للصبح ومن كتر ما زهقنا من القاعده راجل جارنا قال بهزار
ــ بصو احنا متسلحيناهوه ومش لاقيين حاجه نعملها يلا نغزو الشارع اللي جنبنا

كان في شيخ جارنا برضو سلفي طالع بئا نازل شتيمه في الثوره وادي اللي عملته الثوره وكان بيشتم الشيخ القرضاوي بكلام والله انا اهوه عيل صايع واستحي اني اشتم شيخ مهما عمل بالكلام ده
شويه وقعد ينصحنا بئا ويدعينا للاسلام زي ما نكون مش مسلمين بس مفيش مشكله ويقول :
ــ يا جماعه ارجعو لدين ربنا اللي بيحصل ده ابتلاء حرم عليكو اللي انتو بتعملوه ده حرام عليو اتقو الله
في اللحظه دي كان نازل د.محمد جارنا وصاحي من النوم بئا فنزل لقا الشيخ نازل كلام من ده فرد عليه وقال
: ايه يا عم الشيخ هو احنا اللي بنسرق وعملين بلطجه احنا نازلين نحمي البلد ارحمنا شويه بئا

يوم 1/2/2011 اتأكدت يومها ان خلاص البلد دي اتغيرت ( ومش بقصد بالبلد مصر لا بقصد اهل مصر )
يومها كنا انا واصحابي علي اطراف البلد وسمعنا ضرب نار برشاش ألي ولاول مره ويمكن أخر مره جرينا كلنا تجاه ضرب النار وبسرعه شيده جدا من الخوف لحد يكون جراله حاجه ولا في ايه وكده
واكتشفنا بعد كده انه راجل اعمال معاه رشاش واقف فوق السطح عنده بيضرب نار عشان محدش ييجي
المهم في الموضوع ان اصلا مكنش في ولا بلطجي قعدنا في الشارع اسبوعين ممسكناش واحد بس
واللي حسبته في دماغ بعد كده من القرف اللي تلفزيون النظام كان بيقوم بيه وعملية الترعيب دي كان برضو بيشاركو فيها رجال الحزب الواطي في كل حته في مصر زي انهم يضربو نار عشان الناس تسمع الصوت وتترعب ولما تبحث يقولهم اصل انا لوحدي وخايف من البلطجيه واصلا اصلا مكنش في حاجه

في الايام دي بجد حسيت ان انا اتغيرت مبقتش اخاف من الموت حسيت اني اتغيرت اني غيرت نفسي من جوه وقولت خلاص يا مبارك زمنك فات مهما هتعمل عمره ما يرجع
وافتكت كلام ربنا سبحانه وتعالي
( لا يغير الله ما بقوم حتي يغيرو ما بأنفسهم )

والايام دي بجد حسيت اننا اتغيرنا فيها كلنا بما فينا اللي مكنش مع الثوره وحتي اللي ضد الثوره
كله اتغير وبقا راجل وابن راجل بقا يخاف ع البلد دي
عشان كده انا لما كتبت حاسسها اتغيرت مكتبتهاش علي رحيل مبارك
كتبتها علي تغيير البلد وعودة مصر لحضن ولادها تاني حتي لو النظام ده استمر 30 سنه كمان احنا خلاص كسبنا


النقطه التانيه ــــــــــ هل حد حاسس بالتغيير الايام دي ؟

هقولكم انا ع اللي فيها ... من ناحية التغيير انا شايف ان في تغيير كبير حصل ولكن
وحتي لو التغيير ده شمل كل القيادات والموظفين حتي اللي من النظام السابق برضو الناس مش هتحس بتغيير في الحاله دي
ليه كده يا ريس خليك كويس ..
اقولكم ليــــه
لان كتير من الناس بتحسب التغيير تغير سياسي او اقتصادي او او او الخ ...
لكن انـــــــــــــــا واعوذ بالله من كلمة انا بحسب التغيير شخصي
مدام انا اتغيرت يبئا مصر اتغيرت .
مش انا مصر ولا ايه
وانت مصر وانتي مصر وده مصر ودي مصر والحج ده مصر والست دي ام الدنيا
غيرو من نفسكم واتفائلو عشان تحسو فعلا بالتغيير
ولو عايزين تعرفو التغيير اللي تقصدوه ده هيحصل امتي ؟
هيحصل بعد اكتر من خمس سنين ع الاقل
اما لو غيرتو في نفسكم هتحسو بالتغيير وبالتفائل بعد اكتر من نص دقيقه بس
هـــــــــا تختارو ايــــــــه ؟

بالله عليكو يا شعب مصر ما تخلو البلطجيه تنتصر علينا
احنا عشنا 18 يوم من غي شرطه ولا حتي جيش لان الجيش كان متمركز في مناطق حيويه بس
وحمينا البلد دي بإيدينا وبدمنا ومحدش فينا طلع جبان
طب ليه نحصر بعض علي بعض
أك البلطجه اللي مبنتش ولا يوم في مصر طول الثوره هتييجي دلوقتي عشان الناس تقول ادي مجايب الثوره
طب والنبي ده اسمه كلام ؟

والنبي يا اهل بلدي متخلونيش اندم اني قولت

انا بتنفس حريه  خلونا نكمل بعض ومنخونش بعض
الثوره عملتلنا حاجه كبير اوي حلوه للبلد دي بلاش بدل ما نبني عليها نردم عليها
افتكرو شكل الشباب اللي ماتو وضحكتهم في الصور واللي صورهم خلت الثوره تكون ثوره بجد وخلت الناس اللي كانت مضلله من التلفزيون المصري تنضم للثوره بسبب ضحكة واحد من الشهداء
دمهم في رقبتنا كلنا والله يوم القيامه لو ضيعنا دمهم هدر ومحفظناش علي ثورتهم

واخر الكلام
.
.
.
.
سلام


لو عجبك كلامي
انضم ع الجروب بتاعي علي الفيس بوك








إرسال تعليق
مازلت عايش في الحياه بكيفي