متخافوش



محاولة الاخوان الوصول للسلطه ( مش اللي بتتاكل ) مش عيب ده حق مشروع لاي مصري والكلمه الاخيره للشعب
ظهور التيار الاسلامي بشده علي الساحه حتي بتشدده ( مش عيب ) الناس دي اتنفخت من مبارك والسادات
اللعب بمسدس الاعلام المصري تاني بعد الثوره ( مش عيب ) ما احنا بئا لينا الحريه نفتح قنوات ونتكلم زي ما احنا عايزين
المطالبه بالدستور اولا او الانتخابات اولا ولا حتي تأجيلهم ( مش عيب ) ده رأي ولكن رأي الشعب هو اللي هينفذ
الاعتصام ( مش عيب ) مهم مش قاعدين في الشارع في عز الشمس من غير قضيه !! وبعدين بنشوف النتايج بعيونا يبئا ليه بنعيب علي الاعتصام
ظهور اختلافات كتييييييير بين ابناء الثوره ( مش عيب ) ومش نط ع الثوره ولا حاجه كل واحد ليه وجهة نظره بس لما بنتفق وندعي لمليونيه الميدان بيتملي
ان القذافي يقول ان ثورة مصر وتونس مخربه مش عيب دي شهاده اننا ع الطريق الصح
انك تنتقد المجلس العسكري بشده مش عيب لانه دلوقت بمثابة رئيس
ان حد لسه مش فاهم يعني ايه ثوره مش عيب ( مش كلنا جيفارا يعني )


العيب بئا

انك كحاكم للبلد تخون خيرة شباب الثوره بدون أدله ده عيب
انك متخليش محاكمات علنيه الا بعد 6 شهور ده عيب
ان القاضي بعد 6 شهور يكتشف ان قضية العادلي ومبارك واحده ويضمهم لبعض ده العيب
ان مذيع التلفزيون المصري يقول الرئيس حسني مبارك وسيادة اللواء حبيب العادلي وزير الداخليه ده العيب
انك كلواء في المجلس العسكري تقول لسه بنتعلم الديمقراطيه ده العيب .. لو لسه بنتعلم مكناش جبناك في مكانك دلوقت وكان مبارك مازال موجود
ان المحاكمات العسكريه مازالت قائمه ده العيب ولما الشباب يعتصمو عشان تتلغي نخونهم
ان الظباط اللي قتلو ولادنا لسه بيشتغلو ونقول اصل الدخليه ليها كيانها ومش عارف ايه ده العيب وبعدين نلوم علي اهل الشهداء
انك تمنع مذيعه ( دينا عبدالرحمن ) من الظهور تاني في برنامجها عشان انتقدتك ده العيب
انك تقول نفس كلام مبارك ونظامه ان البلد بتضيع ( ده العيب )

مش عايز اكتر في الكلام بس انا عايز اقول لكل الأطراف
والله العظيم احنا في حاله طبيعي
بل أقل من الطبيعيه كمان
بالكتير قدمنا سنه واحده
وهيتم فيها انتخابات مجلسي الشعب والشوري
وبعديهم الدستور ثم الرئاسه
وشوفو العالم كله هيكون باصص لينا ازاي
يمكن أكتر من اللي عملناه في الثوره كمان
يبئا نفكر في اللي جاي مع استمرارنا في المطالبه بحقوقنا ( وده مش عيب )
انا عايز أهديكم حاجه بسيطه جدااا لكل مصري سواء بئا مع الاعتصام ولا ضده
مع المجلس ولا ضده
مع الدستور اولا او الانتخابات اولا
اي حد ليه اي موقف
يسمع الاغنيه دي

واخر حاجه عايز اقولها
الجيش بتاعنا وقف معانا وقفة العمر
وربنا عدي البلد دي من مرحله كانت ممكن تضيع
احنا حافظين الجميل للجيش لكن لما بننتقد بننتقد المجلس العسكري بصفة حاكم
ومع ذلك انا عايز اقول .. لو الجيش زي ما بيقولو كان عايز يخلص الليله كان خلصها
اقولهم بصو علي سوريا ,, اليمن ,, ليبيا
مدام الشعب خرج .. حتي الجيوش متقدرش تقف قصاده
واحنا كشباب مصري عرفنا العالم كله يعني ايه ثوره سلميه !!
واللي مستكتر علينا الحق ده او مستنكره .. يبص حواليه ويراجع فيديوهات الثوره ويتفرج
ويشوف كمية القنوات اللي مكنتش بتجيب اي حاجه غير اللي بيحصل في مصر
احنا مش بلد صغير ولا شعب عادي
احنا رومانة الميزان في المنطقه بحالها
وعشان ربنا صاين البلد دي
بهديكم الاغنيه دي واتأملو كل كلمه فيها
واوعو تخافو من اللي جاي
عشان زي ما بيقول تامر حسني ههههههههههه
اللي جاي احلي




إرسال تعليق
مازلت عايش في الحياه بكيفي