عن أفلام البورنو أتحدث







الموضوع اللي هنتكلم فيه حساس شويـه .. لذلك اللي معندوش ثقافة الصدام مع الواقع ميقرأش عشان ما يتصدمش !!

أنا متابع بصوره مستمره الصفحات الاجتماعيه ع الفيس بوك .. المتخصصه في نشر مشاكل الناس علي الاعضاء وكل واحد بيقول رائيه , وده بيتم عن طريق ان العضو يرسل مشكلته في رساله خاصه الي ادارة الصفحه وبعدين ينشروها من غير اسمه ويبدء الاعضاء في التعليق بالسلب او الايجاب علي المشكله وتقديم الحلول المناسبة من وجهة نظر كل فرد عشان يستفيد منها صاحب المشكله الغير معروف .

من أكتر المشاكل اللي لفتت انتباهي واللي خلتني أقرر أكتب عنها خصوصا انها اتكررت اكتر من مره وخـصوصاً ان اللي بيرسل المشكله بيكون من الجنس اللطيف " بنت " بالرغم من حساسية الموضوع ... كانت عباره عن الافلام البورنو بالنسبه للشباب !!

والحقيقه ان تقريبا كلهم متشابهين في سرد القصه ونفس المخاوف ونفس التردد اللي مش عارفين يعملوا ايه بعد معرفتهم بالوضع ده !!

المشكله عباره عن .. ان بنت ما اكتشفت بطريقة ما ان أخـوها اللي أكبر او أصغر منها بيتفرج علي أفلام بورنو علي الكمبيوتر .. وهي اتصدمت ومش عارفه تعمل ايه !!

واللي خلاني أنفعل أكتر بالموضوع ... طبعا مش ان في ولد بيتفرج علي بورنو !!
" مفيش ولد في مصر ما اتفرجش علي بورنو #حقيقه لا مفر منها "
اللي خوفني أكتر .. ان معظم او كل البنات اللي بترد بينصحوها انها تواجهه وتهدده انها تقول لوالديه او انها فعلا تقول لوالديه .. والمضحك من وجهة نظري ان معظم إن لم يكن كل الأباء عارفين ان أولادهم بيتفرجوا ع الكلام ده .. وممكن يتخذوا موقف تجاهم لو كان سنهم أقل من 20 سنه لكن اكتر من كده الأب والأم مبيقدروش يتكلموا في الموضوع ده معاه بل بالعكس بيحسوا انهم مشتركين في الذنب اللي خلاه يعمل كده .. لذلك بيكون في حل وحيد وهو الجواز بأسرع ما يمكن !!

وهنا عايزين نحط خطوط تحت نقطتين هامين جداً

أولهم .. ان للأسف من اللي انا شايفه ان مفيش ثقافه عند البنت في مجتمعنا في العلاقه مع اخوها من حيث النقاش في موضوع زي ده !!
لانه مستحيل هي تفتح معاه حوار زي كده ؟؟
ولو اتفتح .. هيكون اخر مره يتكلموا فيها مع بعض ع الاقل بصراحه لان الولد هيتكسر من جواه لما يعرف ان اخته اللي اصغر منه شايفاه مُذنب انه بيتفرج علي الحجات دي في الوقت اللي هو من يأسه من المجتمع ومن الظروف ومن نفسه هو اصلا اتجه للحل ده .. تصبيره !

تاني نقطه .. ان احنا في مجتمعنا مركزين اوي علي ان السبب في الموضوع ده هو عدم الجواز وصعوبة الحياه الاقتصاديه وبس ..!!
والحقيقه غير كده خالص .. لان في ناس مُدمنين مشاهدة افلام بورنو !!
وفي ناس متجوزه اصلا وبرضو بيشوفوا الكلام ده !!
والصدمه الأكبر ان في نسبه كبيره من البنات برضو بيتفرجوا علي الكلام ده ودي حقيقه اللي ينكرها يكون بينافق نفسه !!

انا من سنتين بالظبط قريت بحث ان معظم البنات اتفرجوا بنفسهم او اتكلموا مع اصحابهم عن موضوع معين في فيلم بورنو !!
وده انا موقفتش عنده لاني شايف ان نفس الاسباب اللي بتخلي الشباب في بلادنا يتفرجوا علي افلام بورنو موجوده بنفس النسبه عند البنات !!
لكن الفرق الوحيد ان الولد يقدر يوصل للكلام ده بطريقه أسهل كتير من البنت , لانه أولاً علي درايه كامله بعشرات المواقع من النوع ده إما بمساعده شخصيه او صديق أرسله موقع وثانياً لان البنت في بلادنا عليها رقابه أكتر من الولد بكتير !!

عندنا أسباب كتير بتقنع الشاب انه معندهوش غير الطريق ده عشان يرضي رغباته والحقيقه الرغبات هنا مبتكونش جنسيه بس .. الحرمان العاطفي أخطر كتير من الحرمان الجنسي !!

وعن طريق خبرتي الشخصيه و خبرات اصدقائي الشباب اللي متجوز او خاطب او مرتبط .. لما يكون الولد بيحب ومرتبط ببنت .. كلامه معاها في اي حاجه حتي لو في الكوره بس بطريقه رومانسيه بتضيع من دماغه أي حرمان جنسي .. وبيقدر يفهم انه كان محتاج شعور عاطفي في الوقت ده وان الاحتياج الجنسي يقدر يصبر عليه وقت اكتر ويقدر يستحمل وهو مستريح كمان !

اللي أكتر من كده .. ان مفيش ولد حب بنت واتخيل نفسه معاها في احلامه في وضع جنسي .. انا متأكد من ده عن طريق خبره وكلام مع ناس كتير .. عمر ما يكون الولد بيحب بنت ويتخيلها عريانه مثلاً .. في الوقت انه بيتخيل معظم البنات اللي يعرفهم حتي لو اصدقاء أقربين في الوضع ده معاه شخصياً وبيشبع حاجته الجنسيه عن طريق العاده السريه معاهم في أحلامه !!
مدام البنت جميله وجسمها عاجب الولد أكييييد انه تخيلها في الوضع ده مهما كانت صفتها ايه الا في حالتين اتنين .. انها تكون مُحرمه عليه فـ العقل طلقائياً بيرفض حاجه زي كده .. الحاجه التانيه انه يكون بيحبها وبرضو العقل بيرفض يتخيل مصدر الرومانسيه في حياته اللي بتوهبله فرحته وحبه للحياه المستمر ده انها تكون هي مصدر الشهوه الجنسيه اللي بتييجي وتروح في غضون دقائق ويمكن ثواني !!

اذاً انا من وجهة نظري ان الحرمان العاطفي هو السبب الاول عندنا ان الشباب بيعملوا كده !
أيـضاً الفشل في الحياه او في الدراسه !!
أيضاً انه يكون كاره البيت اللي عايش فيه وأهله !!
ده كله بيسبب عنده فراغ قاتل بيسمح بسهوله جداً انه يكون مؤهل لأي شئ غلط !!

في ناس تقول : ان السبب هو البعد عن ربنا وعدم التدين ؟
الاجابـه وبكل ارتياح ... انت بتكدب علي نفسك !!
انا أتفق ان البعد عن ربنا وعدم التدين " الصحيح " بيسبب أيضاً فراغ قاتل ويأس
وأتفق ان التدين اللي يُحاكي العقل ويجعله مشغول دايما بالعالم اللي خالقه الله والدين اللي بيحس دايما علي التعب ورا احلامك وانك لازم تكون أفضل .. وانك بتعرف تحب كمبدء أصيل في الدين انك تحب ربنا وتحب الرسول الكريم وتحب المتدينين ده بيمنع بقدر كبير الفراغ اللي يوصل للمرحله دي !!
لان مفيش انسان متدين ومبيعرفش يحب !! ده تدينه ناقص أكيد

ولكن في مجتمعنا نسبة التدين اللي بالوضع ده .. أعتقد انها قليل ومناسبيه يعني بتييجي فترات كده والواحد بيرجع لحياته تاني .. وكمان التدين اللي بالوضع ده أعتقد انه موجود بصوره أكبر عند البنات لاسباب كتير جداً أقلها ان هما مبيتعرضوش للفتن اللي بيتعرض ليها الشباب في المجتمع ده !!
وأخر شئ في موضوع التدين .. انا شخصياً اعرف ناس كتير متدينه وبتصلي وبرضو بتييجي ليهم فترات ولازم يتفرجوا علي افلام بورنو !!
انا مُصر اني أسميه مرض يصل الي الإدمان وليس ذنب يُعاقب عليه فاعله
وعندي دليل قاطع وحازم !!

العرب هما أصحاب أكبر نسبه للدخول علي مواقع البورنو في العالم !!
في الوقت اللي المفروض هما أصحاب المجتمع الشرقي وانهم مسلمين وهكذا !!
والدول الغربيه ميجوش حاجه جنبنا في الموضوع ده .. هتقولي مهم اللي عايزينوه بيعملوه هيتفرجوا ليه !!
طيب تقدر تقولي نسبه وتناسب يعني .. احنا عندنا كام شاب مش عارف يتجوز فـ بيتفرج علي المواقع دي ؟؟ الرقم عمره ما يدي الانجاز ده اننا نكون رقم واحد في الدخول ع المواقع دي !
يعني تقدر تقول ان مش بس الشباب اللي بيتفرجوا .. لاء
في نسبه كبيره منهم متجوزين وخلافه .. يعني مُتاح ليهم العلاقه الجنسيه ومع ذلك بيتفرجوا واحيانا بيخدوها علي انها دروس تعليميه !!


تقدر تقولي انت أخر مره اتفرجت علي بورنو كانت امتي ؟؟
أراهنك ان الفتره مش اكتر من اسبوع واحد !!
واللي عنده فتره اكبر من دي انا أهنيه و أشد علي يده :)

تعالوا نلتفت بجد للمرض ده .. قبل ما يتحول ملايين الشباب الصغير مع الوقت اللي مدمنيين
ويبقي زيهم زي أجيال الشباب العشرينيه الان انهم اول من صنع للبورنو جزء من حياته لا يتجزء
تعالوا نكره المرض ده بس ما نكرهش فاعله .. لانك انتي لو بنت إكرهي الحاجه دي بس متكرهيش جوزك او خطيبك او اخوكي لان بكره ممكن اولادك يكونوا كده لو فضلنا نلوم ع الشخص ومنبصش ع المشكله نفسها !!

أخر حاجه الناس اللي هتقول الحل الوحيد ان مواقع البورنو تتقفل !!
أخي الكريم .. أختي الكريمه .. في برامج حجمها 5 كيلو بايت بتتحمل في ثانيه واحده .. تقدر تفتح كل المواقع المغلقه عادي جداً

عندك مجتمعات زي المملكه السعوديه مثلا .. مقفول عليهم المواقع .. وصل بيهم الحال الي أبعد ما تتخيل من انتشار الدعاره والشذوذ في بلاد الحرمين
وان الفعل المُجرم في العلن .. بيتعمل في الخفاء
وصل الحال انهم بيشتروا البورنو من شباب البلاد التانيه بفلووووس كتيير
وصل الحال بأعداد تخض من المُخنسين !!
وصل الحال في بلاد الخليج انها أكبر منطقه فيها بيوت دعاره في العالم ككل !!
الحجب وفرض القوه عمره ما كان حل
الحل هو الثقافه المجتمعيه
والحل الوحيد من وجهة نظري للمشكله دي في بلدي انا مـصر
...
..
.

زي ما قال محمود عبدالعزيز في مسلسل باب الخلق
" قنبله تجيب عاليها واطيها "

أخي الشاب الصغير .. أختي العفيفه .. الواقع أسود بكثير مما تظنون

اما عن الحل من وجهة نظري في المشكله التي بدأت بها الموضوع ..!!
فـ الدعاء ثم الدعاء ثم الدعاء ولا غير
الي كل بنت حصل معاها حاجه زي كده .. اخر حل ممكن تفكري فيه انك تتكلمي مع اخوكي في موضوع زي ده مهما وصل بيه الامر !!
ودي وجهة نظري المتواضعه .

عبدالرحمن سامي 

إرسال تعليق
مازلت عايش في الحياه بكيفي