عيال الشارع | عبدالرحمن سامي

الصُحبه زمان كانت عزوه ..

كانت لسه بتوهب فرحه .. 

كان اللعب معاهم يحلي , 

وكان طعم الشارع أحلي . 

نبدأ نتجمع ع المغرب .. 

ونروّح بعد صلاة الفجر .. 

كان عندك حلم .. 

كان عندك سر , قبل ما يتحول مليون سر .. 

كان عندك صبر .. 

كنت بتتخانق ميهمكش أثار الجرح , 

كنت ساعات بتحس بـ فرح , 

أو تحديداً , كنت تملي تحس الفرح في صوت اللمه .

شوف دلوقت ..!! 

الأيام لفت في فلك كوباية شاي وسيجاره .. 

اختفي صوت لعبك مـ الحاره .. 

وطلع صوت دابحه الدخان , 

بيناكف ويزعق لـ ولاد الجيران . 

كنت زمان تلعب متحبش حد يزعقلك .. 

تتخانق ويا اللي يحاول ينكر حقك !! 

وكأن الشارع ليك إتباع .. 

كنت بترهبهم بالأتباع .. 

شوف دلوقت ..!! 

إزاي بتزعق في الأطفال , 

شوفت ازاي بيجيبوا صُداع ..!! 

لسه الشارع زي مهوَ ..؟ 

شكلاً أه 

طعماً لأ 

وانت ازيك ..؟ 

أنا مخنوق مـ الشارع جداً 

كاره صوت اللمه .. 

عايز الحق ؟ 

سيبك مني , لسه الشارع زي مهوَ . 

أنا بس اللي بحاول أتفلسف , 

علشان أثبت .. 

إن حكاوي الشارع أيام حُكمي .. 

كانت أحلي . 

منا كنت كبير الشله , 

وكان اسمي بيتردد في اليوم 100 مره , 

كان ليا مكانتي .. 

كنت حكيم جداً , وفتوه .. 

شوف دلوقت , مش برتاح غير في العُزله . 

بقت الناس دلوقت تشوفني , 

تقولي ازي ظروفك ؟ 

ليه معدناش بنشوفك ؟ 

مش متضايق .. 

أنا مبسوط جداً جوه , 

مش هنكر .. 

بفرح لما الناس تحكيلي مواقف ليا .. 

لسه الشارع زي مهوَ 

سيبك مني , 

لسه عيال الشارع بره .

ـــــــــــــــــــــــــــــ 

عبدالرحمن سامي 

ـــــــــــــــــــــــــــــ 

Facebook