ثلاثية ديسمبر











عاد الشتاء

ديسمبر , دايماً بيمثلي حجات كتير معظمها حزين او يدعوا إلي الحزن !
الشتاء , الفصل الأجمل بالنسبه لي من بين كل فصول السنه ..
يمكن بوهم نفسي بكده , او يمكن المعلومه حقيقيه !
لكن الأكيد ان في أسباب خارجه عن ارادتي بتخليني معنديش حلول تانيه غير اني أحب الشتاء !
حتي كُرهي للبحر , يعتبر في نفس الخانه , غير معلوم بالنسبه لي حقيقة هذا الكُره !
البحر مكان مُخيف , منظره في عيني بشع , أوسع من اللازم وأعمق من المطلوب .
في بداية الخلق , لما تجبر الجن اللي كانوا بيسكنوا في الوقت ده الكوكب بتاعنا , أرسل لهم ربنا جيوش من الملائكه تحاربهم وتطردهم خارج الارض , فـ اتجهوا الي البحار !
وعرش أبليس ملكهم هناك علي الماء !
قرأت من قبل أيضاً أن عرش الله قبل خلق الكون كان علي الماء !
المكان مُخيف فعلاً ..
كل دي احتمالات , لكن الاكيد برضو ان هنالك أسباب خارجه عن إرادتي بتوجهني للإتجاه ده !



الصُحبه !

من كام شهر وأثناء خدمتي في الجيش , يوم عودتي من الاجازه حصل الحوار ده بيني وبين أحد الاصدقاء هناك ..
- انت جيت بدري ليه يا عبدالرحمن ؟
- زهقت من البيت , كده كده انا راجع النهارده فـ قولت أجي أنام هنا بدل ما كنت أنام واصحي متأخر وماجيش وتبقي كارثه
" بعد ما ولع سيجارتين "
- تعرف يا عبدالرحمن , انا كان أسوء يوم بالنسبه لي من وقت ما دخلت الجيش , هو يوم عودتي من الاجازه , بس الفتره دي حصلت حاجه غريبه !
انا بقيت أحب أرجع الجيش , عارف انه بضان وحوارات وقرف وهستني شهر عشان انزل تاني واحتمال اكتر , بس ع الاقل مابقتش اتضايق وانا راجع من الاجازه !
- تصدق انا كمان بقيت كده ؟ انا مابقتش أعرف أنام في البيت ! لازم أنام هنا في العنبر ده وعلي السرير ده بالذات , اتعودت انام مع ناس كتير في نفس العنبر , اتعودت انام علي صوت الموظفين الصبح , انا بقيت مابنامش في البيت بقيت أخاف !
- عارف يا عبدالرحمن أحلي حاجه فيك ايه ! انك مكبر دماغك , حتي لما بنتكلم عن علاقتنا بعد الجيش انت الوحيد اللي مابتديش وعد انك هتسأل , بتقول انتو أصحاب ربنا بعتهملي يهونوا عليا الفتره دي لحد ما تعدي والسلام !
- تصدق شكلكم هتوحشوني
- ( مبتسماً ) يعني هتسأل ..؟
- طبعاً .. بس الاكيد انه مش هيكون بشكل مستمر او مُنتظم , مش لازم اقولك الاسباب لانك مش هتفهمها , هي حاجه فيا تقدر تسميه عيب خُلقي مولود بيه , مابسألش ومابزعلش لو ماحدش سأل !



إفطر

اليوم مُرهق يا فولان , أنا مش مستحمل الصيام !
احنا لسه قبل الضهر وانا بموت بالشكل ده ولسه ورايا سفر !
انا هنزل اشتري أكل وسجاير , خلي بالك من العربيه علي ما ارجع !

- لو سمحت علبه ال ام وأي حاجه تتاكل !
" بيطلع المحفظه , لقاها فاضيه "
إلحق يا فولان , محفظتي فاضيه مش لاقي فيها لا الفلوس ولا البطاقه ولا الكارنيه ! انا هرجع اشوفها في الدولاب وجاي !
يرجع يلاقي انه أخد المحفظه الفاضيه وكان ناسي اللي فيها الحجات !
يا ولاد الايه , انتو فاطرين ؟
تصدقوا لو مكنتش ناويت الفطار كنت روحت من غير المحفظه ؟
هاتوا أشرب ..
- استني احنا باعتين نجيب فطار هنفطر كلنا
احنا في جهنم كلنا يا جماعه .



غياب الأمل

مفيش أصعب علي الانسان من ضياع الامل , إلا رؤيته وإدراكه انه بيضيع !
أكثر الناس حكمه هو اللي بيوصل في أخر الأمر ان الانسان ماهو الا شوية أحلام ممزوجين بنشاط وطموح بيصبره وبيحفزه , انه يصحي من النوم كل صباح !
الأمل لم ولن يكون أبداً هو الغايه ولا الهدف المنشود .. يمكن عمرك ما هتوصل للمنطقه دي , لكنك بتعاني أساساً من غياب الحافز اللي يخليك تقوم من النوم , حتي ولو قرفان !

أسوء إحساس , انك تُدرك انها النهايه خلاص وتبطل توهم نفسك !
المعرفه أحياناً تقتل .
الأكيد انها بتغيرك تغيير جذري في أي شئ كنت فاكر او واهم نفسك انك علي معرفه كامله بنواحيه !




" من أنا لأقول لكم ما أقول لكم "
#درويش









إرسال تعليق
مازلت عايش في الحياه بكيفي