كـ تقييم الافلام نحن





الفكره اللي حابب اتكلم فيها لها علاقه بشئ بحبه , الأفلام 
تقييم الأفلام من 10 درجات وعدد من قيموا الفيلم من الأشياء اللي ساعدت أفلام كتير علي الانتشار , وبرضو من الاشياء اللي دفنت أفلام كتير مالقتش رواج عند المعظم فـ تم تقييمها برقم صغير او تجاهلها 

فكرة انك تشوف فيلم عشان تقييمه عالي أصبحت تصيبني بالإشمئذاذ 
وده لا يعني إطلاقاً ان تقييم الفيلم لا يعنيني , بالعكس
لكن انا بتكلم عن إختزال جمال الافلام في رقم اسمه تقييم ورقم تاني اسمه عدد من قاموا بهذا التقييم

علي الموقع الشهير imdb
التقييم بيكون من جنسيات مختلفه واعمار مختلفه واذواق مختلفه وناس متابعه فعلاً سينما لها رأي حقيقي , كونها اهتمت تعمل أكونت علي الموقع وتقيم الافلام اللي شافتها 
لكن برضو بنشوف أفلام كتير متقيمه زياده عن اللزوم اللي بيسموه ( أوفر ريت ) وأفلام تستاهل تقييم أعلي ومشاهده أعلي لكن يمكن عدد من قيموه كان قليل فـ بالتالي ماخدش فرصه في الانتشار رغم جودته وده بيسموه ( أندر ريت ) يعني مهضوم حقه بالعاميه 

الفكره من المقال بقي مش الافلام زي ماقولت من الاول ..! 
الفكره هي الشخصيات , اللي هما احنا .. 
انا وانت وصاحبنا فولان وباقي الشله وباقي الدفعه والدفعات السابقه واللاحقه بينا ..!! 
و خصوصاً حالياً مع هوجة السوشيال ميديا , أصبح الشخص منا ماهو إلا تقييم
بتجيب كام لايك ؟ عندك كام فولور ؟ 

وكأن اللايكات والفولو أصبحوا هما الدليل علي نجاح الشخصيه دي
صحيح هما دليل علي نجاحه في المكان ده او يمكن نجاحه الاجتماعي عموماً , لكن نجاحه في تكوين شخصيه مختلفه مُثقفه
ده لا يعني ان كل اللي بيجيب لايكات كتير فـ هو شخصيه تافهه مُصطنعه , بالعكس .. لكن احنا محتاجين نبص ع الموضوع من وجهة نظر تقييم الافلام كده

عمرك شوفت فيلم وانبهرت به ولقيته مُصنف وواخد تقييم مُنخفض
طيب هل تقييم الناس بيأثر علي تقييمك ؟ 
يعني مثلا داخل وناول تدي الفيلم 8/10 وبعد ما شوفت الفيلم واخد تقييم مثلاً 6/10 قام دخلك الشك وقررت برضو تقيمه تقييم عالي لكن استقريت عند 7/10 بين بين


هل الاصدقاء اللي واخدين سيط وتقييم عالي من الجمهور اللي هو انا وانت وباقي الدفعه زي ماقولت , خلاص مع مرور الزمن هيزيدوا مش هيتراجعوا , لانهم عندهم ارضيه ثابته من الماضي وهي تقييم عالي فـ كل اللي بيدخل عليه جديد بيلاقيه متقيم عالي فـ دُغري بيقيمه عالي وبيعتبره الشخص الوهم اللي محصلش , لانه يمكن لو حب يقول رأي مختلف وينقد الشخص ده هيخاف من رد الناس الكتير اللي مقيماه ومدياله حجم اكبر بكتير من حجمه

طيب هل الشخص اللي مابيجيبش لايكات في حياته عموماً كتير ومش عامل ضجه دايماً معناه انه فاشل او ع الاقل أفشل من الشخصيه الاولي اللي اتكلمنا عنها ؟ 

في القرأن الكريم ربنا بيبين لنا طبيعة الانسان وليه وامتي بيشوف نفسه أفضل من غيره .. 

( فَقَالَ لِصَاحِبِهِ وَهُوَ يُحَاوِرُهُ أَنَا أَكْثَرُ مِنكَ مَالًا وَأَعَزُّ نَفَرًا

هل مازال الناس بتحس بأفضليتها بكثرة المال ومن حولهم
يعني هل انا افضل منك عشان معايا فلوس , مش شرط بمعناها التقليدي , خلينا نبص عليها من مشتقاتها ومن الحجات اللي بتشتريها الفلوس
يعني موبايل احدث حاجه فـ صوري بتطلع كأني عايش في روما , وخلافه عشان مانهريش في المنطقه دي

وهل الناس بتحس بأفضليتها , أو اللي حواليهم بيوهموهم او بيحسوا انهم افضل منهم لانهم أعز منهم نفرا , بيجيبوا لايكات أكتر منهم يعني !! 
فكر فيها مع نفسك .. 



الخُلاصه .. 
تعامل مع الشخصيات اللي في حياتك من فكرة تقييم الافلام عموماً لكن مش كـ حقيقه مُجرده
فولان صحيح من دفعه قديمه لكنه شخص جيد لذلك محافظ علي شهرته وتعايشه مع الزمن علي فترات متتاليه رغم ظهور مئات الشخصيات غيره

فولان لسه حديث السن , لكنه مُميز وعامل ضجه , يمكن يحافظ عليها ويمكن تكتشف انت بنفسك انه كان موضه وهتخلص يوماً ما

فولان كنت فاهمه غلط ( مقيمه غلط ) وشوفته وعرفت فكره فـ رجعت تقيمه تقييم عالي وتديله حقه , حتي لو الناس اللي حواليك او اللي حواليه مقيمينه منخفض

فولان في حياتك تقييمه عالي رغم ان المعظم أجمع انه أوفر ريت
فولان في حياتك تقييمه منخفض رغم ان البعض قال انه أندر ريت

خد الشخص كـ كل من جزء , وحتي لو هو كـ كل مش قد المستوي , يمكن تلاقي ( جزء ) من الكل ده مُرضي بالنسبه ليك , مش عيب انك تهتم بالجزء ده حتي ولو لفتره من الوقت وتسيبك من الكل



الخُلاصه مره تانيه

هل هتساعد الشخصيات اللي عامله ضجه انها تستمر رغم معرفتك ان دماغها مجرد إناء خاوي
المساعده عباره عن الشكر فيما يفعل او تشجيعه او حتي اللايك والكومنت !! 


هل هتفضل خايف تقييم الشخص المهضوم حقه في حياتك , وتعارض اللي بيقول عليه مش قد المستوي وتعلن انك شوفت فيه حجات كويسه وهي كذا كذا كذا , يمكن غيرك يبدء يلتفت له ويقيمه كويس كون ان احنا مش ماشيين غير بالنظام ده ( الناس قالت كذا يبقي بلاش نخالف أحسن ) !! 
وفي أنواع تانيه لا تقل سطحيه عن الاخير ( الناس قالت كذا يبقي خالف لمجرد المخالفه ) !! 


في الأخير .. 

ممكن تكتب اسمك وجنبه اي سنه تحبها من بعد ميلادك بـ الطريقه اللي بيتكتب بيها اسماء الافلام زي كده مثلاً 

Abdelrhman Sami ( 1997 ) 

وتفكر مع نفسك ان الاسم ده هو اسم فيلم فعلاً وانه له تقييم وكمان له نوع ( دراما , كوميدي , خيال علمي ... ) وابدء أتعامل مع كده ولو لمجرد دقيقتين هتفكر فيهم !! 
شوف نفسك فين في التقييم , أوفر ريت ولا أندر ريت , ولا في المعقول !! 
ممكن كمان تعمل كده مع الشخصيات اللي في حياتك او اللي هتيجي علي بالك , وتشوف تقيمهم من خلال متابعتك لـ مُتابعيهم تخيل مثلاً اسم شخصيه انت متأكد انها بضان وواخده تقييم عالي تخيل معايا 

Folan ( 2005 ) 
8.5/10 

معقول !! فولان البضان الخاوي المُفلس واخد التقييم ده !! 
ايه الاسباب ..؟ 
فكر 

ابدء راجع كل الشخصيات اللي في حياتك بالطريقه دي , صدقني هتفرق معاك , وابدء بنفسك أولاً زي ما قولت وكمان قيم نفسك , انا عن نفسي هقيم الفتره اللي انا بعيشها في اخر 3 سنين كـ الأتي 

Sami ( 2013 ) 
6.4/10 


وكل فتره في حياتي لها تقيمها , سلسلة أجزاء بنعيشها لكنها مش بنفس المستوي بالطبع , دي حاجه مابتحصلش في السينما والخيال اصلا ان اجزاء سلسلة افلام ما تبقي كلها بنفس المستوي , مابالك بالواقع !! 








إرسال تعليق
مازلت عايش في الحياه بكيفي