إطلع يا عاشور

بقالي سنه الشخص اللي جوايا كان محبوس .. 

لأ أكتر من سنه , طبعاً الشخص ده مُقيد بقاله 24 سنه جوايا , لكني عمري ما حسيت انه مسجون غير في السنتين اللي فاتو ! 

دخول الجيش !! 

أكتر حاجه كنت خايف منها وانا داخل الجيش , اني أتغير للأسوء ! 

أنا سئ بدرجة كبيره , الخوف عمره ما كان من الشئ السئ بقدر مهو من الأسوء منه .. 

طول عمر الشخص اللي جوايا ده هو اللي بيوجهني في حياتي عموماً , وعمري ما ندمت اني مشيت وراه أبداً أبداً أبداً , غير مره ! 

فـ ان يكون عندك دليل بيرشدك و يغلطك ( مره ) ده مش الشئ الكارثي اللي تفرح بسجنه بسبب انه غلط مره معاك !! 

مرحلة ما قبل الجيش دي ماكنتش سهله , ولا قصيره ! 

انا خلصت كليه في شهر يونيه 2013 

ودخلت الجيش في شهر يوليو 2014 

سنه كامله من الفراغ في المنتصف !! 

هوا , كلها مواعيد كشوفات وورق وتفييش .. 

أوسخ شئ في فترة ماقبل الجيش , هي المواعيد .!! 

انت بتقدم في شهر وبعدين تقعد شهرين علي ما تروح تكشف ثم شهرين علي ما تسمع ارجا ثم شهرين تلاته علي ماتترحل وتدخل الجيش !! 

الشخص اللي جوايا كان مرضي جداً بـ 3 حجات كنت بعملهم بكثرة .. 

1 - بسمع موسيقي بحبها 

2 - بشوف أفلام كتير ( أجنبي ) 

3 - بنام كتير 

دول أكتر حجات بعرف أعملهم أصلاً في حياتي 

أي مكان كنت فيه لازم يتعرف عني اني ( مهووس ) مزيكا , خصوصاً الجيش !! 

كان مشهور عني ان دماغي مختلفه وبسمع حجات عجيبه ( علي حد وصف الاصدقاء ) .. 

بس انا مع الموسيقي بروح يعني , بروح حرفياً .. 

( with the right music you either forget everything , or you remember everything ) 

حاجه من كده يعني !! 

السينما !! 

أعظم اختراع في حياة الإنسان طبعاً بالنسبه لي !! 

بحب كل مدارس السينما في العالم , شوفت افلام امريكي , انجليزي , ألماني , فرنسي , تركي , هندي , كردي , لاتيني , أسباني , افريقي , فلسطيني , جزائري , الخ الخ الخ .. 

السينما بالنسبه لي هي حلم عظيم في واقع تافه .. 

فيلم مُدته ساعتين ممكن يكون السبب في فرحه وراحه وحُب مفيش اي حاجه تانيه حسستني بيهم من سنين !! 

أنا كده ! 

الجيش بعدني عن متابعة مسيرة الافلام :( 

كانت سنه صعبه علي .. 

أتذكر وبشده , وانا في مركز التدريب , كان أكتر حاجه نفسي فيها في حياتي ان يجيلي فرصه تاني أسمع ألبوم

lana del ray - Born To Die

كنت من شدة التعب والإرهاق وغياب النوم كنت بسمعها بتغني لي في الهوا كده لوحدي .. 

كنت أدفع نص عمري وحد يفرجني علي مشهد من فيلم بحبه !! 

عشان كده فترة الجيش سجنت الشخص اللي كان مُقيد جوايا .. 

وحتي , 

بعد ما انصلح الحال وبقي مُتاح ليا بحكم الاقدميه والسلطه والفهلوه والأجازات الكتير اني أبدء أرجع لحياتي دي .. إلا اني ماكنتش بحس بطعم الحجات زي ماكنت بحسها !! 

انا فعلاً فضلت سنه كامله ماتفرجتش علي فيلم !! 

ماستمتعتش بإختياري لفيلم ما وعمل دونلود وبعدين مشاهدته في طقوسي الخاصه , إلا بعد ما طلعت من الجيش !! 

السينما !! 

شئ من أساسيات الحياة مش من كمالياته !! 

لكن مش السينما بتاعتنا طبعاً , ومش بقول كده عشان الهوجه اللي طالعه اليومين دول وافلام السبكي والليله دي لأ .. 

اللي مُهتم بالسينما العالميه ومُتابع علي قد حاله زيي كده , يعرف كويس ان 99% من أفلامنا الممتازه اللي بتكسر الدنيا هنا لنجوم عُظام في بلدنا , كلها كوبي بست من أعمال أجنبيه ! 

انا مبسوط .. 

ليه ؟ 

عشان الفتره اللي فاتت دي قدرت أتغلب علي الحبس اللي جوايا وأبدء أرجعه من السجن لـ القيد ودي تفرق كتير !! 

الفضل كله لربنا , ثم لـ السينما :) 

بحاول أرجع لمهارات كتير كنت اكتسبتها من حياتي المواظبه علي الافلام ! 

مش حابب اتكلم عن المهارات دي لانها لسه في مجال التطور ومقدرش اقول اني أملك شئ وانا عندي حته منه بس !

يكفي ان اكتر حاجه فرحتني الفتره اللي فاتت , اني اشتريت هارد جديد للكمبيوتر بدل اللي اتحرق ورجعت أبدء حياتي الشيقه البسيطه اللي بحبها ! 

يمكن ده أعظم شئ عملته في السنه الكبيسه دي . 

بعيش مرحلة مشهد : ( اطلع يا عاشور ) 

ومبسوط بيها بعض الشئ , وهي اللي مهونا عليا باقي فصول المرحله البايخه اللي انا فيها .