قـصيدة " ايـوه بـحبك "






قـصيده جديده لـ عبدالرحمن سامي 
بــعنوان " ايــوه بــحبك " 


....




ايوه بحبك 
اخر كلمه هقولها الليله قبل ما نقفل 
انـــا بـــحبك 
حاسس رعشة ايدك دايبه في صوتك وانا بـقولك 
اني بحبك 
بس بلاش تقفلي تليفونك لما أصارحك 
وتغيبي بحجة مـكسوفه وبتفكري 
وعايزاني أشرحلك ؟ ليه انا بحبك ؟ 
انا عن نفسي اساسا معرفش , انا ليه حابك  
يمكن صوتك ؟؟ 
يمكن صورتك ؟؟ 
يمكن قلبي خلاص ارتحلك .. !! 
يمكن نظره في عينك ليا 
يمكن حاسس اني أنفعلك ؟؟ 
يمكن برضو عشان صوت ضحكك ؟؟ 
انا معرفش 
يمكن حاسس انك حباني , فقولت أقولك .. !! 
جايز ان انا محتاج طيبتك ؟؟ 
جايز محتاج اني أكونلك 
بس اكيد ان انا معرفش 

احساسي بفرحه اما عرفتك ؟؟ 
اتعودت خلاص علي دلعك ؟؟ 
مش شايف نفسي غير جنبك ؟؟ 
مهما تكون الاسباب ايــه 
الإنا في ان انا بــحبك 

ردي بأي كلام دلوقتي 
مش هقدر افسر ليه سكتي 
هل قبلاني ؟؟ 
ولا رفضتي ؟؟ 
فرحانه ولا استغربتي ؟؟ 
ردي ارجوكي عشان ما أحترشي 
شكلي صدمتك .. !! 
شكلي اتخطيط حدي معاكي
وانا مش قصدي  
شكلي كده مش مقبول عندك 
يمكن اخري اني اكون صحبك 
بس حبيبك ؟؟ 
باين حلمك في الانسان اللي تحبيه 
مش موجود عندي 
انا بتأسف 
سمعاني ومش عايزه تردي ..!!
تبئي رفضتي 
فـ عموماً رقمي وياكي 
ورقمك عندي 

هستناكي 
اوعي بجد ما تتصليش 
لازم رد عشان ما اتعبشي 


بـــعد شويه 
ردت قالت ايوه يا سيدي 
متأسفه هــا عايز ايه بئا , قول واحكي 
مالك ساكت ليه ما ترد 
انا اسفه كات ماما ندهتني 
فأضطريت أسيبك ع الخط 
ما ترد يا عم تكلمني 

ضِحكت ضحكه هزت قلبي 
وسكتت حبه 
وقالت فجـأه : 
بتحبني ؟؟ طيب احلفلي 
انا سمعاك من اول كلمه بس بناغشك 
اتنهدت وقولت ... 
 ورحمة أعصابي ..
انا بـــحبك 






إرسال تعليق
مازلت عايش في الحياه بكيفي