الفرعون الحاكم




في يوم من الايام
شاف الحاكم منام
ال ايه راح ييجي يوم
وهتنفجر ثوره

راح رابط القيود
راح قافل الحدود
وعمل كل حسابه
خاف تييجي من بره

ونسي انه أب النظام
سابه ينهب وراح ينام
وفي يوم من الايام
قامت ثوره من جوه
صحي الحاكم علي كابوس
لقا نظام قتل النفوس
لقا كلاب نهبو الفلوس
وخدو الارض بالمره

قام الحاكم يصرخ فيهم
قامت الثوره ترد عليهم
قالولو انت اللي مربيهم
وانت اللي سبتها سايبه

م اليوم ده مفيش في خضوع
بعد الثوره مفيش في رجوع
وان كان الحاكم مخدوع
يبئا اش حال الشعب يا ناس
ثورتنا ثورة شباب
رافضين تاني نعيش في عذاب
وعملنا خلاص انقلاب
علي حاكم ملهوش احساس

لو كان مش عارف .. يتنحي
لو كان عارف .. برضو يسبني
كلمة حق اتقالت لله
ايوه رئيسنا بس ظلمنا

طلعت ثوره عشان تتكلم
قالت من ثورتنا اتعلم
احنا سكتنا كتير ورضينا
مش برضانا ده غصبا عنا
ثورتنا ثورة إبهار
خلت كل الناس تحتار
ازاي شعب مات وانهار
يطلع صوته عشان يتقيم

لاء عمر الشعب ما بيموت
لكن كانو كاتمين الصوت
مش عايزين أصواتنا تفوت
علشان الحاكم كان نايم

وبرغم التعتيم والضلمه
وبرغم الحراس الظالمه
وبرغم القيد اللي كاسرنا
قامت الثوره

اتخض الحاكم م الصوت
قال للحاشيه في ايه هنموت ؟
قالو بعيد الشر عليك
ادخل نام واحنا هنتصرف

دخل الحاكم تاني ينام
شاف في الحلم رجل غلبان
قالو يا حاكم اصحي شويه
ولا هتصحي بعد ما نتشرد

بعد يومين كان هاج الشعب
وابتدات الحاشيه تتعب
راحو خالعين النعل وجريو
قالو للحاكم خش اتصرف

وقف الشعب ووقف الحاكم
ناس عايزه الحاكم يتحاكم
وفي ناس قالت الحاشيه يا حاكم
بسببهم عننا متغرب

وعشان الحاكم كان حاكم
قال للشعب انا اللي اتحاكم
الحاشيه دي انا اللي جايبها
وانا هتحمل اي عقاب

وابتدي يصحي الحاكم تاني
غير في نظامه في ثواني
قال للشعب كان في فساد
راح نقعد كلنا نتحاسب

قعد الشعب فوق الاطلال
والحاكم محتار البال
والحاشيه بسببهم ضاعت
سكتو !!
لاء بعتو جمال

تضرب في الشعب وتأذيه
قتلو شباب طاهر ونزيه
غلطته انه طلب حريه
قالت الحاشيه ده شعب عميل

ازاي عايزنا نتحاكم
واحنا ظلمنا بأمر الحاكم
ليه تسيبوه وتحاكمونا احنا
هو الحاكم كان مش عارف ؟

ابتدا كل الظلم يبان
ولا عارفين مين كان غلطان
هل الحاكم ولا الحاشيه ؟
ولا الشعب اللي كان ساكت !!

كان في حكيم واقف وسطيهم
رضيو بحكمه .. ابتدا يخطب فيهم
اما عن الحاشيه يا ولاد
فدي كده كده غلطانه
اما الحاكم بئا يا ولاد
غلطته انه خبي عليهم
وانتو يا شعب يا احرار
غلطتكم اكبر منيهم

بس خلاص قامت ثورتكم
ومعدش في حد هيظلمكم
روحو بئا يلا علي بيوتكم
علشان الحاكم هيحاكم

رد شباب الثوره عليه
مش راح نمشي الا بعديه
زي ما شعبه تعب منيه
لازم قبليهم يتحاكم
وقف الحاكم ويا الشعب
وكلامه مدخلشي القلب
ده بقاله 30 سنه نايم
واللي بيتكلم بيموت

قال الحاكم انا هحاسيبهم
بس سيبوني شويه اجيبهم
انتو يا شعب اللي باقيين
وانا والحاشيه اللي  هنموت

يا عالم احضرو بينا
في حاكم و بيحكمنا
اتزلينا في عهده وموتنا
ازاي تاني نأمن ليه
عايز يدينا حياتنا
ويحاسب كل فسادنا
حاجه تضحك علي حالنا
حاكم ظالم شعبه بإيديه

واللي يعارضه يكون في حديده
والشعب حالف ما يسيبه
عنده بدل اللون ألفين
ازاي يثق الشعب فيه


هاجت الناس من تانيه عليه
والحاكم صعبانه عليه
فرشته اللي ما بينهم عشره
والكرسي اللي لازق في ايديه

طلع الحاكم قال للناس
بصو يا ناس
انا مغلطتش ابدا فيكم
ولا كلت ابدا حق عليكم
ولا سبت الفقر يسليكم
ولا سبت السقعه تغطيكم
ولا سبت الامن يوريكم
ولا جبت جمال تضرب فيكم
وجمال ــ السباك منيكم

قام واقف شب قدامه
الله يحمي البطن اللي جابت زيه
قاله يا حاكم
عارف فرعون
رد الحاكم طبعا عارفه
قاله يا حاكم
انت
زيه

مستكبر تسمع مشاكلنا
واستكترت علينا أحلامنا
والحلم اللي بنحلم بيه
قبل ما بنصحي بتكون حابسه

قبل ما تحبس حلم يا حاكم
احبس صاحبه
ومدام العاشق متهانلك
اقتل حبه
والطفل اللي بيحلم يحكم
اقتل حضنه
واللي بيكتب شعر يضايقك
اكسر قلمه
واللي بيشتم في جمال ,, سنك
اقفل حنكه

بس يا حاكم عايزك تعرف
انك فعلا ده اللي عملته
انت حبست صاحب الحلم
بس الحلم في قلبه بيكبر
انت قفلت الدنيا في وش العاشق
بس الحب في قلبه بيكبر
وانت دبحت الطفل اللي بيحلم يحكم
ونسيت صحبه اللي كان عارف حلمه
وان كنت قتلت التاني برضو
برضو جمالك عمره ما يحكم
وانت كسرت قلم الشاعر
ونسيت موهبته
وقفلت ابئاء اللي بيشتم في جمال ,, سنك
لكن سبت جمالك يلعب جوه العزبه

عارف فرعون طبعا عارفه
ايوه يا حاكم زيك زيه

لما بتعرف فرعون
ليه بئا متعلمتش منه
جاي قبل ما هتموت بثواني
تعمل زيه





إرسال تعليق
مازلت عايش في الحياه بكيفي