حوار في الميكروباص



اتفقت مع نفسي اني اناقش صديقي محمد ( اللي مش مقتنع حتي الان بالثوره ) وسط مجموعه من الناس ونحن في انتظار السياره للذهاب الي الجامعه

اعتمدت ان يسمع الناس نقاشنا بصوت واضح وفي مواضيع كثيره لاثبت لنفسي ان ما اقتنع به هو الصحيح وان هذا الشعب المصري شعب واعي ومثقف ويفهم ما يدور حوله

في البدايه بدءت الحديث مع محمد في بدايات الثوره ونحن وسط جموع من الناس وبدء محمد يقول العبارات الدارجه علي ألسن المجموعه الشهيره ( قصدي الواطيه ) احنا أسفين يا ريس

فقال محمد : أدي نتيجة الثوره الاجره غليت والسولار شح من السوق والبلطجيه في الشارع ليل نهار و و و و الخ ...

طلبت من محمد أن يعطيني فرصه لارد علي هذه التهم المضحكه من الاساس ولم أكن أنوي الرد بشكل أكبر من شغفي بأن يرد أحد الواقفين علي هذه الاتهامات ... للاسف خذلني الناس هذه المره فبدءت الرد علي محمد

انا : يعني انت شايف ان الثوره هي السبب في كل ده

محمد : والله بئا ثوره مش ثوره المهم ان احنا في فوضي

انا : طيب بالراحه كده انت قولت اول حاجه اجرة المواصلات غليت

محمد : اه

انا : طب مهي بتغلي كل فتره من قبل الثوره مش فاكر كذا كذا كذا

محمد : ماشي بس مش كده البلد ومش عارف ايه

انا : متحاولش تتهرب دي حاجه موجوده قبل الثوره صح ولا لاء ؟

محمد : طيب والبلطجيه

انا : لاء استني بلطجية ايه .. انت قولت والسولار

محمد : اه

انا : طب يعني انت معندكش اي فكره ان السولار اصلا كل سنه في نفس الوقت مبيكونش في وبتكون نفس الازمه بل أكتر

بل بالعكس كمان كان في عجز في بنزين 80 ومصر كانت واقفه بسبب الازمه دي هل ده مخطرش علي بالك ؟ هل انت شايف حاجه روتينيه بسبب نظام فاسد ظهرت بعد الثوره مباشرة في ميعادها السنوي انها من أثار الثوره ؟

محمد : سيبك من الكلام الفاضي ده كله والبلطجيه اللي ماليين الشوارع ؟

انا : يعني انت بتخرج من بيتك مش مأامن علي نفسك ؟

محمد : لاء

صمت انا للحظه ... كنت امتص حماسي في الحديث واحاول ان اجد ردود مقنعه

وفي هذه اللحظه تحدث الرجل الموجود جانبنا وقال لمحمد ..

ـ يعني انت يا استاذ لو اتخانقت مع السواق دلوقت هيكون رد فعلك ورد فعله غير اللي كان قبل الثوره ؟

سكت محمد فانطلقت انا متحمسا من رد هذا الرجل وقولت

انا : ليه عايزين تعملو البلطجيه مبدء عام خلاص بئا موجود في كل شارع وكل حاره وفي كل حته والناس خايفه تمشي ما تبص حواليك كده الناس ماشيه بسلام اهوه

في نفس اللحظه وجدنا رجلان يبدأ كل منهما في الاستعداد للمشاجره فضحك محمد وقالي انا مش هرد عليك انا هسيب الواقع يرد عليك

فرد الرجل الموجود جانبي : يا سيدي دول سواقين مع بعض وهما طول عمرهم كده

لم أكن أعرف ان هؤلاء سواقين فعلا ولكن وجدنا بالفعل سيارتان مركونه بجانب المكان الذي تشاجرو فيه وحمدا لله قبل ان يبدء اي منهم في الضرب جري الناس عليهم وفضو هذه المعركه وكل واحد راح لحال سبيله

وعدت انا للحديث مع محمد

انا : بص يا محمد انت ليه عايز تشيل الناس والثوره والشباب مسؤلية الشرطه

محمد : وهي الشرطه مالها ؟

انا : نعم يا اخويا الشرطه مالها ازاي ... بص سيبك من النقطه دي عشان شكلك كده مقتنع بحاجه مش عايز تغيرها

خلينا بالغاز بئا اللي بتبيعه لاسرائيل

محمد : ها

انا : انبوبة الغاز عندك بتوصل لـ 30 جنيه في اماكن وانت بتبيع الغاز لاسرائيل مع العلم ان ده غاز طبيعي وانا فاهم بس هشرحلك وجهة نظري

هب محمد بشئ من النرفزه قائلا : 30 جنيه ايه يا ابني وربنا ما بتزيد عن 9 جنيه

انا : انت هتهزر هو عشان انت بتشتريها من تحت بيتكم ب9 جنيه يبئا هي بتسعه وبعدين اصلا دي بتخرج من الوزاره بـ 2.5 بتوصل للمواطن ب30

محمد : تاني هتقولي 30

انا : يا ابني وربنا بتتباع بـ30 جنيه في مناطق والكلام ده انا سامعه من الوزير امبارح اصلا

التفت احد الركاب امامنا وقال : الانبوبه انا بشتريها بـ 29 و 30 مفيش حاجه اسمها 9 جنيه

سكت محمد ايضا قليلا ثم عاد للحديث عن المقارنه بين هذا وبين الغاز المصدر لاسرائيل مع العلم ان محمد ضد تصدير الغاز

فقولت له : في مناطق في مصر كتير بتشتغل دلوقت بالغاز الطبيعي صح ؟

محمد : صح

انا : طيب وكان النظام البائد بيقول انه بيعمل خطه عشان يخلي الغاز الطبيعي في كل حته في مصر يعني كنا هنخلص من الانبوبه ووجع دماغها ... وبعدين حسين سالم اللي معاه باسبور اسرائيلي اللي كان حاكم مصر فوق مبارك كمان وامبارح قرئت ان جريده اسرائيليه بتقول ان حسين سالم هيشهد مع اسرائيل ضد مصر في قضية الغاز المصدر


بدء الناس في الانضمام للحديث وكان حوارا حضاريا رائع بمعني الكلمه لم ينقصه شئ سوا وجود شخص مسؤل ليسمع الاقتراحات ويحاول ان يطبق الجائز منها

تطرق محمد بعد ذلك للحديث عن ميدان التحرير وان هناك علاقات تحرش بالبنات ( مفسرا ذلك بالحك الجسدي مثلا او ما شابه دون الاعتراض المباشر )

فقولت انا مسرعا : لا لا لا بلاش هجص بئا عيب كده انت بتشتم الثوره ماشي علي اي حاجه انما تقول انهم كانو مش عارف ايه لاء عيب يا محمد

فقال محمد : كان في برنامج واللواء كذا من المجلس الاعلي للقوات المسلحه قال لشاب من شباب الثوره هل لم يكن هناك اي تحرش جسدي في ميدان التحرير فابتسم الشب ولم يجب فقال اللواء يبئا كان في

فقولت : برنامج ايه وحصل ايه ؟

محمد : والله انا سمعت كده

انا : ماشي هفترض معاك كده مع اني زي ما قولت قبل كده اللي ما شفش التحرير في الايام دي مشفش مصر بجد ولكن يا محمد هي مصر دينها الرسمي ايه ؟

محمد : الاسلام ...

انا : وانت دينك ايه ؟

محمد مبحلقا للحظه : اسلام طبعا

انا : طيب هل معني ذلك ان مفيش اي ديانات اخري في مصر ؟

محمد : لاء في مسيحيين ويهود وفي ديانات تانيه منعرفهاش

انا : الله ينور عليك بص بئا ركز معايا عشان متفهمنيش غلط تاني ... هنعتبر الاسلام والمسيحيين واليهود من حيث العدد والنسبه كمثال وليس كواقع ... هل معني وجود مسيحيين في مصر ان مصر دوله مسيحيه ؟

محمد : لاء اسلاميه

انا : ليه ؟

محمد : لان المسلمين اكثر

انا : جميل اوي .. لو كانو المسيحيين اكثر كانت مصر هتكون دوله مسيحيه صح

محمد : صح

انا : طيب معني ذلك ان ميدان التحرير كان الجزء الاكبر منه ناس شرفاء ( كمثال الاغلبيه في مصر ) وقله كثره ( كمثال المسيحيين ) وقله قليله ( كاليهود )

( اوضح قبل اي شئ اني لا اقصد الا التفسير والتشبيه بالعدد وليس بأي صفه او اي شئ اخري واحترم كل الاديان )

محمد : يعني ايه

انا : يعني تفتحلي مخك كده .... لو المسلمين اللي هما الاغلبيه عملو حجات وحشه الدوله هتبان كلها غلطانه صح لانهم اغلبيه

محمد : ده اكيد

انا : طيب لو المسيحيين عملو حجات وحشه هيبان ان الغلط عليهم هما لانهم اقل من الاغلبيه صح ؟

محمد : تمام

انا : طب واليهود لو غلطو هل هيبانو ؟

محمد : لاء

انا : هو ده اللي اقصده ... انت عايز تجيب غلط اقلية الاقليه زي غلط الاغلبيه او حتي اقليه كثره ليه ؟

محمد : خلاص يا صحبي انا اقتنعت بوجهة نظرك


بغض النظر عن اي افكار في المقال الا اني شاركت اليوم في حوار سياسي وطني في الاتوبيس مع اكثر من 15 شخصا في حوار مثمر تأكدت منه ان هذا الشعب مثقف وبشده في الامور السياسيه فلو لم يكن كذلك من قبل فالثوره في اي شعب تكفي لثقيف هذا الشعب لعقود .

والاهم من هذا المقال .... اني حليت كويس في الامتحان
إرسال تعليق
مازلت عايش في الحياه بكيفي