أنا شـايف كده 2








اللي حصل قدام ماسبيرو ما هو الا بيض ( وزاره ) 

..

في اروبا والدول المتقدمه المسؤل ممكن ينزل بشورت وفانله وكاب في الشارع عادي 
لكن احنا هنا عندنا مبدء مختلف تييجي تتكلم في السياسه يقولك اعدل شعرك الاول 
وتييجي تتكلم في الدين يقولك متتكلمش عن النبي ( ص ) الا لما تتشبه به 

..

المصريين شغلو بالهم بـ ( امسك فلول ) ونسيو ان الفلول مبتتمسكش .. بتتفعص بس 

..

فقط في مصر وزير الإعلام هو بس اللي بــ ..... 
أسف ,, فقط في مصر ( وزير اعلام ) اصلا 

..

مدام مش عارفين نواجه الفلول في الانتخابات أقترح اننا نخرج أحمد عز يمسكلنا قوائم المرشحين تبع الثوره ويعملنا خطه من خططه دي ويقضي علي الفلول وساعتها نخرجه عادي 

..

البلد اللي تخاف من ( دقن ) وتخليها رمز لدين واحد تبئا بتستهبل ,, طب ما القساوسه والبابا شنوده مربيين دقنهم ... ياريت نبطل الخوف من المظهر ونرجع الخلاف الي أرضه الطبيعيه ألا وهي
 ( الفكر ) 
لا أكتر ولا أقل 

..

المصيبه مش في أكاذيب التلفزيون المصري والاعلام الموالي له .. المصيبه ان في ناس لسه مقتنعه ان ده منبر إعلامي أصلا 

..

المشكله الكبري عند الغالبيه انهم صدقوا فعلا مقولة ( انت من يصنع الحدث )
بس الحقيقه ( انت من يلبس الحدث ) 

..

تقدر تتوقع مين رئيس مصر القادم ؟؟ ( لاء ) 
اذا الثوره نجحت 
تصدق ان ممكن المشير يتحاكم حتي لو قتل قد اللي مبارك قتلهم ؟؟ ( لاء ) 
يبئا مفيش ثوره مرت من هنا أصلا 

..

هو عصـــام بيـه شـــــــرف .. فطر ايه النهارده :) 
اوعي تكون افتكرت اني هسأل عنه ؟؟ 

..

من الأقوال المأثوره للأنتيكه ( منصور العيسوي ) 
ــ معندناش قناصه أصلا
وانا بزود عليها كام جمله 

ــ معندناش رئيس وزراء أصلا 
ــ معندناش مدرعات أصلا 
ــ معندناش وزير إعلام أصلا 

بالمختصر المفيد معندناش أي حاجه تدين قيادات العسكر في الوقت الحالي 

..

نوجه عناية سيادتكم ان كل المشاكل التي حدثت في مصر منذ الثوره وحتي الان .. تحت حكم العسكر
( المشير وعنان ) 
حد ليه شوق في حاجه !!

..

ملخص مؤتمر المجلس العسكري تعليقا علي أحداث ماسبيرو 
( والله هو اللي ضربني بـ عينه فـ ايدي يا بيه ) 

ملخص بيان عصام شرف تعليقا علي أحداث ماسبير 
( أيها المواطنون .. أنا جاي أعرفكم اللي انتو لسه شايفينه من ساعتين ) 

..

مصطفي بكري بعد خطاب مبارك التاني كان علي قناة التحرير هو ومرتضي منصور 
وقعدو يعيطو ( والنبي سيبوه يكمل مـُدته .. مترموش نفسكم الي التهلكه ) 
وبعد 8 شهور من الوقت ده .. طالع يحكيلنا أسرار محدش يعرفها الا هو ايام الثوره 
( حمرا يا بكري ) 

..

الطبيعي اما حد يزهق من قناه بيقلبها او ( بيقفل ) التلفزيون 
ده اللي عمله المجلس العسكري بالظبط .. متضايقين ليه ؟






إرسال تعليق
مازلت عايش في الحياه بكيفي