مواقف من حياتي

1

من حوالي 10 سنيين وفي الأجازه الصيفيه طلعنا رحله تبع الحضانه بتاعة اختي .. أسرتي وأسرة عمي محمد العزيزه

وبـعد يوم حافل وممتع .. وقبل بدء حفل نجم الجيل في الوقت ده " خالد عجاج " زن ولاد عمي الصغيرين " أولي ابتدائي " انهم يركبوا الساقيه اللي بالحبال دي .. امي قالتلي خدهم وروح ركبهم واحنا قاعدين هنا .. رايح انا علي اساس اني الكبير وراسم الهيبه وان اللعبه للصغار فقط وبما ان ولاد عمي التؤم في أولي ابتدائي لكن انا ما شاء الله في اولي اعدادي فكرت اني مليش حق اركب اللعبه دي لاني مش صغير .. وأول ما وصلنا قدام البوابه ولسه بقول للراجل لو سمحت دخل الاتنين دول .. لقيته قالي يلا بسرعه خشوا خشوا عشان نبدء ..!

خشوا ..؟ ده قصدني انا كمان معاهم .. هو مخدش باله الاهبل ده ان ولاد عمي في اولي ابتدائي لكن انا يما هنا يما هناك في اولي اعدادي .. يظهر ان انا اللي كنت مفكر اني يما هنا يما هناك .. بس في الحقيقه اللعبه كانت رائعه , وخصوصاً ان دي كانت المره الاولي اللي أتلذذ باللعب بأشياء الصغار وانا كبير " كما كنت معتقدا يعني "

2

من حوالي 10 سنيين برضو وبـعد ما خصلت أولي اعدادي .. عرفت ان احمد ابن خالتي " أنتيمي " في الوقت ده هيقدم في المدرسه العسكريه اللي في حوش عيسي وهيسيب التعليم ويدخل الجيش وخصوصا ان معاه واسطه وان ابوه نقيب في المدرسه دي .. انا بصراحه غيرت وقولت اشمعني هو .. لاء بقي انا كمان هدخل الجيش

واللي أغراني أكتر اني عرفت ان بعد ما تخلص دراسه 3 سنيين وتتخرج منها بتشتغل وتقبض ستووووووووميت جنيه في الشهر " 600 " يااا سلام بقي انا كمان سنتين تلاته هقبض المبلغ ده وأبقي راجل بقي ..!

الغريب في الامر ان ابن خالتي كان فاشل طحن في الدراسه عكسي تماما اللي كنت شاطر بالقدر اللي خلاني بعد كده دخلت ثانوي عام ودخلت كلية تجاره يعني .. لكني أصريت اني أقدم معاه واستغل الواسطه بتاع ابوه

يوم الكشف .. ابن خالتي مدخلش كشف معانا .. انا اللي دخلت ووقفت في الطابور في الصاله الكبييره " بالبوكسر " بس وجه الدكتور وركز علي ضهري وشد انتباهه .. عنقود العنب الرائع اللي ورا كتفي اليمين .. ومن غير ما افهم قالي خد هدومك واخرج ..!

خرجت قعدت في الانتظار لوحدي وقاعد زعلان ومكتئب .. وكان في راجل بينضف المكان لاحظ اني فشلت اني ادخل الوظيفه التاريخيه دي .. جه الراجل وقالي : مالك يا ابني .. انت مدخلتش ..؟

قولتله لاء .. قالي يا ابني ده من حظك هو انت ساقط في المدرسه ..؟

قولتله لاء ده انا جايب مجموع عالي .. قالي اومال ايه اللي حدفك هنا يا ابني .. ده انت بكره تحمد ربك انك مدخلتش

والحقيقه الراجل طلع عنده حق ..؟

أولا لاني اكتشفت اني بكره الحياه العسكريه كره العمي .. ويسقط يسقط حكم العسكر

ثانياً موضوع 600 جنيه في الشهر ده كان أوفر شويه .. خصوصا اني دلوقت بطمح ان مرتبي يكون 5000 دولار في الشهر ..!

3

في شهر ديسمبر 2010 جالي جواب علي البيت بتحويلي لمجلس تأديب بالكليه لمشاركتي في مظاهرات الجامعه للتنديد بتزوير انتخابات مجلس الشعب 2010 وإهانة الحزب الوطني .. والحقيقه التهم دي اتغيرت في مجلس التأديب لما العميد ما اقتنعش بيها .. فـ محامي الكليه غير التهمه لـ " تعطيل الدراسه في كلية هندسه "

اول ما عرفت الخبر .. روحت علي مكتب وكيل الكليه لشؤن الطلاب .. واللي كان بيربطني بيه علاقه من اول السنه بسبب موقف ما .. قولتله يا افندم حصل كذا كذا كذا .. قالي متقلقش انا هتصرف والطلاب هنا ليهم كرامه ومش عارف ايه .. واتصل بمحامي الكليه قاله الظباط بتوع الامن عرفوا شكله منين وجابو اسمه منين وانا هعمل وهسوي .. وبعد ما عزمني علي كوب من الليمون .. قالي فوت عليا يوم السبت عشان نكمل الموضوع ..!

ولما روحت يوم السبت ... لقيته طلع علي المعاش .. ولحد الان كل ما يشوفني في الكليه ميبصليش مش عارف ليه ..!