دُش بارد | عبدالرحمن سامي






( 1 )

كل عام وانتي بعيده
كل عام بنساكي حبه
بدعي ييجي عليا عام
تبقي بالنسبه لي ذكره

كام سنه عدت ولسه ..
برضو فاكرِك
كام بُنيه استلطفوني ..
ولسه انا بتمني عطفِك !!


( 2 )

كل عام وبحاول أنسي
كل عام وفي أي مطرح
لما بتعب , لما أحب أدعي عليكي
بدعي زي ابن الملوح !!

**
شكل ورده لما تطرح
شوكها يجرح
واما اشوف الدم سايل
مني بفرح !!

دمي يتحول ندي
فوق ورقها
فـ تنتفض
فوق كده , انا مش هلمح !!

**

حتي لو عدت سنين
مهما حتي تختفي
مش بإيدي , اني عشت معاكي حاجه
رافضه حتي تتنسي !!


( 3 )

اللي معروف عني جداً
اني طيب
واني هادي
واني احب اقعد لوحدي
واني بتغير كتير
واني عصبي .
واني بنسي ... لما بفهم
مدام حفظت ... عادي أشخبط !!

فـ ... مكان كنتي وهماه بيه
يوم سبتيه
رحل هوا
وعشش فيه
فـ خلدتي المكان جواه
وده معناه ... !!
..... بالظبط !!


( 4 )

اتقسمت اتنين بسببك
حد كارهك , حد حابك
حد بالنسبه له انتي متساويش
" امتلك يأذيكِ "
لكن متخافيش
اللي كان حابك رفض
استغفرلك , فإتغفرلك .

اتقسمت اتنين بسببك
والخناقه دايره بينهم
فـ الحياه فصلتني عنهم
بس لسه ممتلكهم
بس برضو متخافيش .
منا اتعاملت معاكي بعد فُراقنا يما ..
لكن انتي مابتشوفيش
واللي أكد لي الحكايـــه
حد ساعدك ...
فإبتسمتي وقولتي شكراً
معرفتنيش !!

فـ صدقيني لما أقولك
" امتلكت أأذيكِ "
لكني مأذتكيش


( 5 )

دُش بارد ابتسامتي
دُش طاوله انتعشت
لما بوعد لازم أوفي
بتمني أكون اتفهمت !!

مش مهم لو كدبتي
مش مهم لو كدبت
رغم ان إجواني أكتر
النتيجه .. إتغلبت !!

التحدي لنفسي كان
ارمي كلام في خط سيِرك
حتي لو قراه كتير
محدش يفهمه غيرك !!

انا لسه عند وعدي
اني أعيش أحاول أفرح
بيكي من غيرك , بكره ورده
في شجره تانيه تطرح !!

سما بتمطر كدب
الصدق غرق في شبر
قالت لي لو الطريق اتسد
هتبني بينا جسر !!

كنت عارف انك كداب
بس استنيتها تييجي منك
قصيده ناهيتها بـ راب
بتقولك عيش , انا مسامحك .


وكل عام وانتم بخير :)


ــــــــــــــــــــــــــــــــــ

عبدالرحمن سامي
31/21/2013

ــــــــــــــــــــــــــــــــــ










إرسال تعليق
مازلت عايش في الحياه بكيفي