مدينة الدجال | عبدالرحمن سامي

لولا انتقادكم ليا منين أجيب معاني جديده .. 

بحتاج للكراهيه عشان أكمل القصيده ..

فارس منفي من أرضه راح سكن جزيره بعيده ؛

بيكوّن جيش جديد عشان يحرر الأميره .. 

مش معني إن العداد معدليش اني مركبتش .. 

هدفي الأساسي أحسسك اني مغبتش .. 

دوّر في جحور مدينتك هتلاقيني سايب بصمه .. 

كاتب ميعاد رجوعي , خوّد مكاني لو مظهرتش .. 

لو مؤمن بالقضيه مش مهم ايـه هيحصل .. 

لو حابب تنتصر متنتظرش المهدي يوصل .. 

مدينة الدجال قصادك شيل سلاحك وادخل .. 

رجوعك معناه انك حابب الفساد يطوّل .. 

كلامي ده معناه انك مش هتحارب لوحدك .. 

في غيرك منفي من سنين مستني فرصه زيك .. 

ضلام الغابه في البدايـه وّحش هدفه ياكلك ؛

لكن مع التعود هتلاقيه واقف في صفك .. 

قولتهالها مالي غيرها , نصيحتي ليك اتمسك بيها .. 

لو غابت ملامح الطريق وتوهت هتلاقيها .. 

هي فاهمه تعقيداتي وّنستني في انطوائي .. 

يعني مهما فكرك يفلت , هتعريـك مهما تغطيها ..

لو السلاح في ايدك دوس علي الزناد بسرعه .. 

الدعوه للسلام في وقت حرب مُجرد بدعه .. 

في مدينة الدجال القتل أصبح زي سلعه ؛

والناس اللي قتلت النهارده , بكره هييجي دورها .. 

لو إتقدملك كاس فيه دم متترددش واشرب .. 

لو الكُرباج في إيدك إضرب متضيعش الفرصه .. 

لو جالك واشتكالك , ابتساملك و أهدالك ؛

طريقه مُبتكره للهروب متستغباش وتهرب .. 

في مدينة الدجال الإبتسامه مُجرد خدعه .. 

الشر حاكم عاجز ساند نفسه بالجبروت .. 

الحق قادر لكن ساجن نفسه في الملكوت .. 

فارس هدفي الأساسي أحط حد للسكوت ؛

هتفرق ايــــه ؟ طول ما الطريق نهايـته موت . 

ـــــــــــــــــــــــــــــــــــ 

عبدالرحمن سامي 

8/3/2014 

ـــــــــــــــــــــــــــــــــــ