عمرو نوهان الذي أعرفه





من اوائل الناس اللي عرفتهم علي تويتر زمان كان شاب اسكندراني اسمه عمرو نوهان  , كان نشط جداً علي تويتر دايماً وعلي طول مُهتم بالبلد وبالاخبار واول ما افتح تويتر الاقي سيل من الريتويتات علي الصفحه الرئيسيه من عمرو نوهان , كنت بعرف من خلاله اراء ناس كتير جداً عن مواضيع كتير جداً .
كان دايماً يعملي ريتويت لأي موضوع اكتب فيه حتي لو كتبت 100 تويته في نفس الموضوع وهو شاف انها مهمه كان يعملهم كلهم ريتويت , وكان بينا تواصل علي تويتر فقط وردود متبادله في مواضيع مختلفه !

عدت كذا سنه وبالصدفه لقيته كاتب عنده انه هيروح يكشف طبي يوم كذا , في الفتره اللي انا كنت بقدم فيها في الجيش , كلمته وعرفت انه هيدخل الجيش معايا نفس الدفعه !
لما عرف اني كمان بقدم قالي كلمني ع الفيس بوك , وبدأت صداقه افتراضيه بينا علي اساس هدف جمعنا اللي هو الجيش !
عمرو كان من الناس المهتمه جداً بالتفاصيل , كنت لما ارجع من كشف ولا الارجا او اي يوم ما قبل الجيش , الاقيه بيسأل عملت ايه ؟
وبعد اول اجازه من الجيش في العيد الصغير كلمني ع الفيس بوك وعرفت انه في مركز المعادي بينما انا في مركز 3 مشاة في قويسنا , وكنا بنتكلم عن الاوضاع وكان مبسوط بالمركز في المعادي ويحكيلي الشقاوه اللي بيعملوها هناك وتفاصيل اليوم عامل ازاي وكده !

عمرو كان دايماً مهتم بالتفاصيل زي ما قولت , كان بيعاملني بصداقه غريبه رغم اننا عمرنا ما شوفنا بعض في الحقيقه , يقولي خد كريمات ضد الشمس نوع كذا كذا سعرها كذا , وخد معاك مش عارف ايه , واعمل مش عارف ايه ومتقلقش من التوزيع !
وهكذا كان حواري المستمر مع عمرو في كل اجازه , لحد ماتوزعت انا وهو راح السلوم , وكنت بكلمه كل اجازه واعرف اخباره ايه وكان دايما متفائل وعمره ماحسسني انه مضغوط وكان متقبل الامر بصدر رحب جداً !

بظروف الجيش والاجازات بعد كده انقطعت اتصالاتنا علي الرغم انه بعتلي رقمه ومن المفترض اننا كنا نتكلم بصوره مستمره بس للاسف محصلش !
استمرت العلاقه من خلال البوستات اللي بيحطها واللي بحطها وكنا بنعرف اخبار بعض في الجيش من خلالها ومن تويتاتنا علي تويتر بصوره مستمره !
وهكذا مرت سنة الجيش بكل ما فيها .

اول ما سلمت ونزلت اجازه خلاص كنت في حاله رهيبه من الراحه النفسيه اني خلصت جيش , وكنت بحاول اتواصل مع كل اللي عرفتهم في الجيش في الفتره دي عشان اعرف هما سلموا ولا لسه ؟
كان من ضمن اللي حبيت اعرف اخبارهم , عمرو نوهان , لكن بحثت عن بروفايله لقيته محذوف !!!
طب علي تويتر ؟ كذلك الامر مش موجود
ماخدتش في بالي وعدي اليومين ولا اعرف ايه حصل !

كنت ناوي اعمل مجموعة تدوينات عن حياتي في الجيش علي مدار السنه بحلوها بمُرها بكل حاجه !
وبالفعل كتبت اول تدوينه وسميتها عنبر 4
اول اسم عنبر سكنت فيه في الجيش , في مركز التدريب !
بعد ما نشرت التويته بدقائق , بالصدفه وقعت في خبر بيقول ان في عسكري اتسجن في الجيش 3 سنين بسبب صوره رفعها للسيسي علي بروفايله بودان ميكي ماوس !
اتخضيت في البدايه لاني كنت شوفت الصوره علي بروفايل عمرو من فتره قصيره وشكيت في الامر !!

فتحت الخبر ولقيت اسم العسكري ( عمرو نوهان )
في البدايه ارتبكت , معقول ؟
رجعت ابحث تاني عن بروفايله برضو مش موجود , اتأكدت ان في حاجه وان هو فعلاً
صدقوني اول حاجه قررتها اني ماكملش التدوينات اللي كنت ناوي اكتبها !
معقول ؟ الراجل المفروض كان يخلص جيش معايا من يومين وبدور عليه عشان اباركله انه خلص , فجأه الاقي اسمه وخبر انه اتحاكم واتسجن 3 سنين ؟
طب ليه ؟


عمرو انا اسف اني اتأخرت في الكتابه عنك , واسف اني مش هقدر اكتب اكتر من كده واكيد انت هتبقي متفهم ليه انا مش هكتب اكتر من كده !
انت اكتر حد يقدر يفهم ليه مش هكتب اكتر من كده في الموضوع .

ربنا يخرجك بالسلامه يا صاحبي وترجع تنور تويتر تاني بالنسبالي , وترجع تنور حياة الناس اللي انت كنت منور حياتهم قبل البلاء ده !

#الحريه_لعمرو_نوهان





إرسال تعليق
مازلت عايش في الحياه بكيفي