ما بعد الـ 27 | عبدالرحمن سامي

( 1 )

مابعد الـ 27

كما قبل الـ 27

شكلنا هانكمل متفارقين

ومفيش ولا أمل انها ترجع

فإعتبر الموضوع كان مقلب

عيشته بنفسك .

وكدبت الكدبه وصدقتك

وأذيتك جداً ووجعتك

وإتخيلت ان الجاي أجمل

لكن محصلش .

حاول تبدأ ماتفكرش

كان نفسك تفرح وياها

لكن ربنا ما أرادش .

( 2 )

بالنسبه لحد ملول زيي

القاعده بتحلي أما بسيبها

والكلمه بتحلي بطريقتها

بيشغل غنوه وبيعيدها حرفياً فوق الـ 100 مره

لو حلوه أخرها معايا يومين

وبودعها بشاي وسيجاره

وتخش الليسته مع التانيين .

بالنسبه لحد بسيط زيي

مابحسش إن في ناس وحشين

لو حتي أذاني فولان جايز ,

ماقصدش يزعلني يوميها

وأكيد بيمل البني أدمين

مانا برضو بمل البني أدمين .

وبميل للقاعده مع كتابتي

وبحس براحه وانا لوحدي

متعاده الفكره صحيح عارف

لكن دي حقيقتي .

الناس خروجات

وانا كل خروجه ببوظها

وكأن العيب مش في الأصحاب

والعيب فيا , أو في أصحاب مش مهتمين بيا

عايشين يحكوا لغيري عليا

وكأن الحزن ده موهبتي

أو جين وانا مولود فيا .

( 3 )

حب اللي مايحبكش

وإتعب عشان توصله

أمن لنفس الشخص

مهما تشوف منه

وإفضل في نفس البيت

وإفضل بنفس العمر

وإسهر في نفس البار

اللي أذاك خمرُه

وإحلم ببكره ونام

وإصحي ناسي الأحلام

وشك وقت اليقين

وصدق في وقت الشك

وإتعب بدون ما تنول

وقرب أوي من العك .

أظن دي أسهل طريقة للغباء !

وانت ما شاء الله ما تتوصاش

كام عيد ميلاد عدي وقولت هاتغير

ومابيجراش !

قدمت السبت فـ يا ابن الهبله استني الحد .

واستني لحد ما يصفولك

أو حتي لحد ما يفضولك !

ده انت بطولك , وياريت فيك طول !

أدي حيلك إتهد .

لا بقيت عارف امتي هاتوصل !

ولا فاكر أصلاً امتي بدأت .

( 4 )

ما بعد الـ 27

حاول تفتح صفحه جديده

غير من نفسك بالتدريج . .

بطل تهريج .

من سنه وأكتر قولتلها بحبك

وكتبت كلام .

ماعرفتش توصف إحساسك

ورجعت تحاول 100 مره فـ كتبت ديوان

أهي بكره هاتقراه يا منيل

وهاتلمح إسمها في قصيده

وهاتتخيل ان إنت مازلت .

ما بعد الـ 27

بتحاول تفتح وياها صفحه جديده .

مليون تبرير جواك ليها

لكن في الأخر هي البنت !

والموضوع دايماً صد ورد .

 وانت هاتفرق ايه عن نفسك ؟

ما قبل الـ 27

تقريباً هايكون كما بعد .

( 5 )

أنا بكره نفسي في كل نهاية

وكمان بزهق أوي من البدايات

مع كل صديق بيسيب إيدي

في ورود جوايا بتتقفل .

وحجات بتموت وبتتبهدل

والروح جوايا بتتشكل علي هيئة طفل وبيعيط .

أنا جاهل جداً بالإشارات

مابقتش بصدق أي مشاعر من نفسي

مابقتش أستغرب أي مشاكل مع نفسي !

مابقتش بصدقني أما أضحك وانا واقف أودع كل الناس

وبحاول أبين إني خلاص مابقتش بحس .

وبكلم نفسي وأقول عادي

من بكره أنا هبدء من تاني وأجري علي الله .

وأكتشف إن أنا بزهق وبإن ..

مع كل صديق بيسيب إيدي !

في حجات بتسيبني وتمشي معاه .

عبدالرحمن سامي