بص العصفورة
الناس بتلف وبتشوف بتلاقي ملامح مكسوره
ميت قايم يسأل علي أهله اللي بقالهم ياما مسألوش
ولقاهم فعلاً ناسيينه في ذكري وفاته وما افتكروش
عايشين عادي !
أو مش عايشين
تايهين زي الكل ما تايهين
ضايعين زي الكل وخايفين
مسكين !
كان جاي يفرحهم انه أخيراً بقي مبسوط
ملقاش للفرح في بيتهم صوت
ولا صوره
كان خارج تقريباً علشان مكتوبله يموت تاني
بس المره دي حب الموت
واتمني لو ان الدنيا دي فيلم
وانه مجرد كان عايش حلم
وان مفيش حاجه اسمها دنيا ولا حتي وجود
وان مشاهده إتمسحت بالقصد ومابقاش له وجود
زي الكومبارس الصامت لو شيلته
المشهد هايكمل عادي ومظبوط .
بص العصفورة
الناس بتلف وبتشوف بتلاقي غريب راجع بلده
كان قرر يرجع من فتره علشان ماشلوش حد في مرضه
حاجه وعشرين وبدء ياخد أدويه للضغط
حتي القرشين اللي عملهم لو كفوا الشقه وتوضيبها
مش هايكفوا انه يقدم مهر
الناس ليه خايفه من الفقر ؟
مع ان الموضوع بقي عادي
واقفين بنزق في عربيه في طلعة كوبري
بيقين اننا مهما هانعمل مش هانعدي
واقفين ساندينها علي ما تُفرج
وبنتحصر ونبص ورانا علي الماضي .
بص العصفوره
الناس بتلف ومش شايفين غير بني أدمين
ومفيش طرقات ولا حتي بيوت
والسما غابت
وان حد اتكلم بتشوفه بس بيتكلم
مابيوصلكش الصوت
اذا كان الوضع ده مش بيقول اننا بنموت
حد يفهمنا ايه هو الموت ؟
حتي المزيكا بقت ملهاش معني
شغاله لكن مش فاهمينها
هو الموضوع عمال يتلعبك
ولا الموضوع قرب يتحل ؟
طب ايه الحل ؟
ولإمتي هانفضل مش شايفين غير بني أدمين عماله بتطلع مـ
الصوره ؟
عبدالرحمن يا محترمين بيقدم ليكم فزوره
والحل بسيط !
ماتفكرش اللي انت قريته مجرد شخابيط
وماتسمحش انك تتغفل زي انا من قبلك ما اتغفلت
وان مره سمعت بص العصفورة
ماتبصش علشان مش هاتشوف غير صوره القصد انها تخدع
او وش ملامحه بتتغير
او عمر بيجري علي الفاضي
او صاحب كان مستني الفرصه عشان يغدر
ويغيب فجأه
ويسيبلك ناس تانيه تقولك مالك ؟
مايغيب عادي !
ماتصدقهمش المره دي
وازعل
الصاحب حقه عليك انه لو غاب تتعب
وتحاول تكتبله قصيده يمكن يسمع
وتأثر فيه ويرجع ..
القصد انك تعرف مين فيكم كان الأصدق
وان فعلاً تعبان من بعده
ماتقولوش بص العصفورة !
وابعتله وقوله ان انا قاصدك .
0 عايز تقول رائيك؟:
إرسال تعليق