وعد الحر دين عليه

ايوه يا قلبي انت حر
انا عمري ما غصبتك علي حاجه
وقت ما بتحب تحب بسيبك تحب
ووقت ما بتحب تكره بسيبك تكره
ووقت ما بتحب تبيع وتخون بسيبك تخون
الا المره دي يا قلبي
انا حذرتك من اولها
لو وعدت في المكان ده عمري ما هساعدك تغير وعدك مهما يحصل
مش قولتلك م الاول بلاش
وانت تقولي لاء والنبي سبني انا بحب المكان ده اوي
قولتلك المكان ده عمره ما هيبئا بتاعك
وانت تقولي انت ايش دراك انت انت مش شايف المكان زي ما يكون مرسوم ليا انا
انا حذرتك من اولها
وانت اختارت
ولازم تتحمل العواقب بئا يا قلبي




فاكر يا قلبي الورده دي
مش دي كانت اول ورده تديهالها
صح ولا انا غلطان
انا قولتلك ياعم مليش دعوه مش مديها حاجه
بس انت برضو اديتها ورده
استغليت سذاجة ايدي وخليتها تبعت الصوره دي ليها
وتقولها انك بتحبها
قولتلك يوميها هتجرحك وانت تقولي لاء بتحبني
وفعلا كنت انت صح في الوقت ده وقبلت منك الورده
بس انا برضو فضلت وهفضل علي موقفي ان المكان ده مش ليك انت
المكان اصلا شكله ميلقش عليك
المكان مرسوم علي واحد تاني
يمكن المكان اللي يليق بيك يكون احسن من ده او مش احسن
بس برضو انا قولتلك انه مش بتاعك




طب فاكر يا قلبي الصوره دي ؟
فاكر لما استغليت سذاجت عقلي واقنعتني انك بتحب حب زي اللي في الصوره دي
وانا قولتلك لاء مبتحبش كده
انت يمكن تكون حبيت القاعده دي والشكل ده
انما مش انت اللي تعمل الحركه دي مع المكان ده وفي المكان ده
فاكر لما كنت بتستغل سذاجة عيني وتخليها تعيط لما انت تتوجع
وانا اقعد اضحك عليك واقولك فوق بئا معلش انها جت علي قد كده
وانت تقولي لاء اصل عشان توصل لقمة الجبل لزم تتعب شويه ولازم تواجه الموت انك ممكن تقع في ثانيه
بس لسه موقعتش
وانا اقولك انت اصلا واقع بس انت مش واخد بالك
وانت تقولي لاء انا صح



طب فاكر لما كلمتها عن اليوم ده
وقعدت تشتغلني وتشتغلها وتقولها انك بتحلم باليوم ده
وانا اقولك فوق بئا حرام عليك انت كده هتأذيني معاك وانا مش هسامحك
وانت تقولي يا شيخ اقعد ساكت انا بدور علي مصلحتك اصلا
وانا اقولك بلاش
وانت برضو مستمر

طب فاكر لما اتجاوبت معاك فعلا في يوم من الايام
وقولت اما افرحك شويه
وخدتها وخدتك معانا وروحت اشتريتلكم دبلتين
وخليتكو مخطوبين عشان محسش بالذنب من نحيتك بعد كده
فاكر


فاكر اما كنت بتقعد تضحك عليا وعليها انك بتحلم ان انا وهي يكون عندنا اولاد
وتشوفنا متهنيين سوا
وانا اقولك يا قلبي انت بتفكر في مصلحتك انت
انما انا مصلحتي مش هنا ابوس ايدك اهدا بئا
وانت برضو تقنعني وانا امشي معاك برضو بسذاجتي

مش مهم تفتكر كل ده
ومش مهم تفتكر انت وهي افترقتو ازاي
المهم ان انا هنفذ اللي انا قولت عليه من الاول
وانت اتحمل العقاب بئا يا حلو
فاكر اما قولتلك المره دي بجد ولو كرهتها مش هخليك تحب تاني
طب اديك كرهتها يا فالح
وعايز تدور علي حد تاني
انسي يا لذيذ
انا قولتلك زمان وعد الحر دين عليه وانت وعدتني ووعدتها انك مش هتنساها ولا هتفكر في غيرها
وقولتلك انت حر اعمل اللي انت عايزه وانت اختارتها
طب يا جميل كمل حياتك علي كده بئا
وحياتك عندي منا مخليك تقرب من اي مكان تاني
ولو حتي عملت ايه عمري ما اخليك تحب اي مكان تاني
مش انت كرهتها ؟
انا بئا لسه بحبها
وهفضل احبها بالعند فيك بئا هه

انا هكمل حياتي علي كده
من غير اماكن
يا المكان اللي انت وعدته انك هتفضل جنبه مهما يحصل
يا بلاش يا قلبي
واذا كنت انت مبتعرفش تقرر وتاخد قرارات
انا ارجل منك وخدت قرار اني مش هنساها
ومش هخليك تحب غيرها
ويا انا يا انت يا ابن الـ ت,,,,,,,,,,,,يت يا اللي جايبني لورا
اديك حكمت عليا وانا مظلوم
وانا بئا هحكم عليك عشان انت ظالم
لو مكنتش ظلمتها
فانت ظلمتني انا واتحمل بئا يا حر


جلسة محاكمة قلبي 20/12/2050

علي ذمة القضيه
وهو محبوس دلوقتي في ليمان صدري