ومعملتش الحوار




مـنذ 6 أشهر  , وجدة إضافه من ايـميل اسمه – soso  - وطبعاً قبلت الاضافه وانتظرت اشوف مين سوسو دي .
وبـعد دقيقه أعطتني جرس وقالت السلام عليكم ..
-         وعليكم السلام
ثم قالت : حضرتك الاستاذ عبده سامي صاحب مدونة باب شارعنا .. ؟
-         اه , خير
انـاا صـحفيه في جريـدة الأسبوع , وكنت عايزه أعمل مـعاك حوار عن المدونه و كده
-         اهلا وسـهلاً
طيب تـحب نتقابل امتي .. ؟
-         الوقت اللي تحبيه , انا جاهز
هو حضرتك منين .. ؟
-         المنصوره , ميت غمر
بـجد .. ؟
-         هو في منصوره بجد ومنصوره بهزار .. !
لاء أصل انا من المنصوره اصلي , وكنت نازله يوم الاربعاء أزور قرايبي , ايه رائيك نتقابل يـوم الاربعاء ؟
-         اوي اوي مفيش مشاكل , تحبي نتقابل فين والساعه كام .. ؟
اديني رقمك وانا هكلمك يوم التلات بليل أعرفك الميعاد والمكان , تمام ؟
-         طيب تمام , ده رقمي 0000000

وانتظرت بـشغف يـوم الثلاثاء , وذهبت الي الجامعه – جامعة المنصوره – وجلست أنتظر تليفون الاخت , لأذهب وأجري أول حوار صـحفي معايا ..
طالت المده وأصبحت الساعه الرابعه عصراً وانا منتظر تليفون الاخت , وقررت أن أعود الي البيت وإن إتصلت قولت لها اني مريض وممكن أن نؤجل الموعد الي باكر , وفي طريقي الي الموقف , وجدت اتصال من رقم غريب فعلمت انها هي المتصل .
وفعلاً عودت أدراجي وذهبت الي المكان المحدد , ووجدتها ..
انها سـاره , رائعة الجمال , وهذا هو المهم الصراحه , الابتسامه لا تفارق شفتيها , والحيويـه تملئها , وعشق المجال وشغفها للعمل كصحفيه يـخرج من عينيها كأنه شـعاع نور يـزودك بطاقه عجيبه .. !
كانت تبدو أصغر مني , كنت أتوقعها أكبر ولكني تفاجئت  , ولا مشكله الصراحه , وقالت انها تعمل صحفيه تحت التمرين ومهتمه بـشؤن المدونات والكُتاب الجداد ..
جلسنا في مكان ما علي الكورنيش , وبدا عليها علامات الخجل , وأستعجبت جدا , فالمعروف ان الصحفيات خصوصاً أبجح خلق الله – هاها هاها – وبـعد دقائق قولت ..
-         هو مش هنعمل الحوار ولا ايــه .. ؟
قالت : اه طبعاً , انا بـس بـستحضر الروح عشان ادخل في المود علي طول .
-         طويب
سكتت دقيقه , ثم قالت في خجل : بص هو انا مكنتش هقولك بس بصراحه انا حاسه بذنب
-         ذنب .. !! في حاجه ؟
انا بـصراحه من متابعين المدونه بتاعتك , وكنت عايزه اتعرف عليك ونكون اصحاب , وفكرت في الموضوع ده عشان نتقابل ونتعرف علي بـعض اكتر
-         هاها هاها , علي فكره انا مش عبدالرحمن سـامي انا كمان , مكنتش هقولك بس حسيت بذنب
بـحلقت عينيها وقالت , احنا جايين نهزر ولا ايـه ؟؟
-         هاها من الواضح كده
طب وريني بـطاقتك او كارنيه الجامعه اتأكد .. ؟
-         وانا كنت قولتلك وريني كارنيه الجريده اتأكد عشان اقابلك
يعني ايـه يعني ؟ يعني انت عبدالرحمن ولا مش عبدالرحمن
-         عبدالرحمن يا ستي , ما نبني غير القاعده في الجامعه من الصبح
هو بـصراحه انا أسفه , انا مكنتش هاجي أقابلك اصلا والله بس حسيت بذنب .
-         هو ايـه موضوع الذنوب في حياتك ..! خلاص اللي حصل حصل مفيش مشكله
مالك قاعد ساكت كده ليـه ؟
-         ...................

صامت وباصص للنيل , ثم نظرت الي عينيها فجأه وقولت : انتي مين مـن الاخر عشان ما اقومش امشي .. ؟
-         بـصراحه بـصراحه
هــاا بصراحه ؟؟
-         انا نيرمين
اه نيرمين ميـن .. ؟
-         مريم يـعني
مريم مين ونيرمين مين ؟
-         نيرمين  اللي ع الفيس بوك اللي اسمها مريم , ومفهماك ان اسمها نيجار في الحقيقه بس مخبيه ..
اسمك ايـه يعني من الاخر .. ؟
-         هاله
انتي والله جايـه تهزري
-         انا غلطانه اني حاولت اعملك مفاجأه , انت مش قولت انك بـتحبني .. ؟
يا لهوي , انا قولتلك بـحبك .. ؟ انا اصلا معرفكيش لا ع الفيس ولا الايميل
-         لاء مـهو أصل صفا هي اللي فهمتني انك شوفتني في صوره ليها وعجبتك وقولت انك نفسك تكلمني ؟
صفا مين ؟
-         اللي اسمها ع الفيس , سمر
سمر ..؟ انتي والله بتهزري يا بنتي انتي مين ؟
-         انا هقوم امشي , بس لو سمحت متكتبش حاجه عن اللي حصل ده عشان ألاء وصفا لو عرفو اللي حصل هيزلوني , وانا بجد اسفه مره تانيـه
ألاء كمان .. ؟
-         اه اللي اسمها .....
بس بئا , هو كل حاجه اللي اسمها اللي اسمها , انا قايم ماشي انا
لو سمحت متكتبش اي حاجه من اللي حصلت وامسح رقمي
-         حاضر يا أنسه مش هنشر  حاجه اوعدك


....

بالأمس اتصلت بي بنت , وعلمت انها هي ..
قالت : أشكرك انك منشرتش اللي حصل مع انك خلبوص تموت في الفضايح هاها هاها , بـس انا نشرت اللي حصل ع المدونه عندي , كانت مغامره لذيذه صح
-         هـااااا
هاهاهاهاها لا متخدش في بالك
-         طب ممكن لينك المدونه بـتاعتك اقراء الموضوع ؟
تؤ , انا  كنت متصله بيك اشكرك انك كنت وفي للوعد , وكمان اعرفك اني اسمي لمياء , وبجد بجد المره دي لو تحب نكون أصحاب يكون شرف ليا
-         تيت تيت تيت تيت



إرسال تعليق
مازلت عايش في الحياه بكيفي