مـشهد ملوش لازمـه



مشهد من روايـه ليا اسمها " انهيار عقار " لم تنشر بـعد 

**




أبويا .. بسم الله الرحمن الرحيم ,النهارده الاجتماع الشهري لسكان العماره وقبل اي شئ بنقول الف الف مبرو للحج شاكر وزوجته الحجه زبيده علي الحج وان شاء الله حج مبرور وذنب مغفور.

الحج شاكر .. شكرا يا حج محمد وعقبالك انت والحجه ام حاتم السنه الجايه ان شاء الله.
كل الناس .. الف مبروك يا حج شاكر الف مبروك
الحج شاكر .. ربنا يحفظكو وعقبالكو كلكو ان شاء الله.
مؤمن بتاع الرقص .. مبروك يا حج شاكر والله انا امنية عمري يتقالي يا حج هيهيهيهي.
الحج شاكر .. استغفر الله العظيم.
أبويا .. بس بئا خلاص ,, قبل اي حاجه هنتكلم فيها,الاسانسير بايظ بقاله اسبوع معقوله فين حسين البواب.
عمي حسين .. ايوه موجود يا حج محمد.
أبويا .. ايه ياعم حسين الاسانسير بايظ ليه بقاله اسبوع اومال الناس اللي ساكنين فوق دول بيطلعو ازاي.
عمي حسين .. والله يا جماعه انا غلوبت بقا,حضرتكو كلكو دون استثناء طلبت منكم مبلغ عشان نجمع ونجيب حد يصلح الاسانسير كلكو ودون استثناء برضو محدش اداني فلوس
مؤمن بتاع الرقص .. وانا مش قولتلك يا بواب انت تييجي تاخد الفلوس من فوق.
عمي حسين .. استغفر الله العظيم.
أبويا .. عموما يا عمي حسين المبلغ المطلوب كام !!.
عمي حسين .. 500 جنيه.
الحج شاكر .. خلاص يا جماعه نجمعهم من بعض دلوقتي
مؤمن بتاع الرقص .. لا يا حجوج انا مش مستعد دلوقتي
الحج شاكر .. استغفر الله العظيم يارب
مؤمن بتاع الرقص وهو مضايق بئا .. ايه ايه ايه ,, هو كل ما اقول لحد حاجه يقول استغفر الله العظيم يارب ايه بئا الله ياربي
كل الموجودين .. استغفر الله العظيم.


مؤمن قام قايم باصص للكل كده وخارج من الشقه ومش عارف ليه كل الناس فرحت

ابويا .. عموما يا جماعه احنا هنجمع الفلوس وهنصلح الاسانسير.
محمد كريم المذيع المعروف .. والله انا موافق يا حج محمد بس غير الاسانسير في مواضيع تانيه كتير عايزين نتكلم فيها.
ابويا .. زي ايه يا استاذ محمد
محمد كريم .. أول حاجه صوت الدوشه اللي في معظم شقق العماره ده عايزين نضع ليه حد الواحد مبيعرفش ينام.
أمال الرقاصه .. ايه يا استاذ محمد دا انت بترجع من بره وش الفجر.
محمد كريم .. ايوه عشان شغلي مش معقول بئا ارجع بعد التعب اللي انا فيه ده كله ومعرفش انام
هيثم الشاعر .. والله بئا يا جماعه ولا انا بعرف اركز,كل ما بكتب كلمه من كتر الدوشه براجعها وبتأكد
شوفولكو حل بئا
ابويا .. هو ده اللي احنا متجمعين عشانه النهارده,اللي موافق علي طرد الست أمال من العماره يرفع ايده
..
..
موافقه


أمال الرقاصه .. ايـــــــــــــه نعم نعم .. اخرج من العماره ليــــــــه كنتو اشتريتوها ولا اشتريتوها .. تلاته بالله العظيم دي غلطتي عشان اجي اقعد مع شوية ناس زيكو .

وقامت خارجه أمال
بليه بتاع الزمالك .. علي العموم يا حج محمد انا شايف ان ملناش الحق اننا نطرد حد من بيته وبعدين ما احناش اصحاب العماره.
الدكتور خالد .. لاء احنا اصحاب العماره.صاحب العماره مبيشوفش العماره غير كل كام سنه مره وفلوسه بتروحله لحد البيت عنده يبئا ازاي بئا احنا مش اصحاب العماره.
بليه بتاع الزمالك .. ايوه يا دكتور ده ميصحش برضو وبعدين اشمعنا انا اللي مبسمعش دوشه في العماره يعني.
الحج شاكر .. لانك ساكن في اخر دور يا كابتن بليه وبعدين انت بتييجي العماره غير كل فين وفين انت حياتك كلها معسكرات وماتشات وحتي لما بتييجي لو عايز تنام بتعرف تنام لانك بتبئا تعبان
بليه .. طيب يا جماعه محلوله اهيه مدام اي حد عايز ينام هيعرف ينام
ابويا .. سكوت بئا شويه الله يخليكو
انا شايف بئا ان الاجتماعات دي مبقاش ليها لازمه وان العماره مبقاش فيها كبير
مدام كل واحد ليه رائ غير رائ جاره يبئا خلاص احنا مش جايين نوقع الناس في بعضها ,, كفايه لحد كده وتقدره تمشو الاجتماع انتهي
مدام فيفي .. عندك حق والله يا اخويا العماره مبقاش فيها كبير ,, انا طالعه انام احسن وياريت متبعتوليش تاني لو في اي اجتماع



انتهي المشهد اللي ملوش لازمه :)





إرسال تعليق
مازلت عايش في الحياه بكيفي