احتمال الوِحده تنفع









( 1 ) 


احتمال الوِحده تنفع 
يوم ما ترجع مـ السفر .. 
تلقي الصُحاب إتجوزوا .. 
وكل واحد له ملاذ غير القهاوي .. 
احتمال لو كنت ناوي تروح لـ سينما
متلاقيش ولا حد فاضي ..

احتمال مـ القاعده تزهق .. 
متلاقيش غير الكتابه بتندهك .. 
تقوم تدور ع القلم
تلقاه في كرتونة كُتب .. 
 موجوده فيها كام قصيده بخط ايدك .. 
منهم قصيده كتبتها لأخر حبيبه .. 
تقعد في ركن وتفتكر .. 
وتقول لنفسك , ليه كده ؟ 
كان يجري ايه لو كنت يومها صارحتها .. 
مش كان زماني خطبتها
شوف ايـه جرا ... 
قلم الزمن نساك ملامح وشها .. 
مفضلش منها غير قصيده كتبتها


( 2 ) 


احتمال الوِحده توجع 
في البدايه , لكن هتتعود عليها .. 
زي السجاير والكتابه .. 
وقعدتك ع السطح نص الليل .. 
والموسيقي وهي بتدغدغ مشاعرك .. 
تفاصيل كتيره صغيره مسجونه فيك .. 
أو حد جواك أرغمك , ومعاها سَجنك .. 
أو سكه مش بإيديك ماشيها
لكن مدام داق الطريق رجليك .. 
مُضطر تنهيها ... 

كان مين يصدق , ان يوم هتكون لوحدك ؟ 
انت بس اللي فهمت .. 
ان يوم الوِحده جاي .. 
كلهم نسيوك لأنك سيبتهم .. 
وانت بس اللي فضلت تحبهم .. 
بس برضو انت نسيتك زيهم !

" تفاصيل مجهوله
خلت تغييرك يوم عن يوم بيزيد
وانت تعبت ومش فاكر .. 
نُسختك الأولي


( 3 ) 


احتمال الوِحده تنفع .. 
احتمال
احتمال ده يكون في صالحك .. 
احتمال

احتمال , لما ترجع مـ السفر 
تلقي حاجه تونسك .. 
تلقي ناس تخرج معاك .. 
تلقي بنت تحبها .. 
تلقي فكره قابله تتحول قصيده .. 
للحبيبه , اللي جايه .. 
مش اللي ماتت بين سطورك من سنين
تلقي نفسك مش حزين .. 
مهما يحصل .. 
مهما تخسر .. 
قلم الزمن , ووحدتك .. 
قتلوا جواك الندم ..
قتلوا جواك أي حاجه بتضعفك .



ــــــــــــــــــــــــــــــــ

عبدالرحمن سامي 
5/2/2014

ــــــــــــــــــــــــــــــــ







إرسال تعليق
مازلت عايش في الحياه بكيفي