خط دايب








مرحلة !!
مممم
انك تتمني ضربه قاضيه تنهي المعركه
مش فارقه نجاتك من وقوعك جوه المفرمه
كونك وصلت لفكرة انك في الحالتين خسران
هتفرق عندك مين غيرك يطلع كسبان ؟
كونك فهمت انها كل ما تتقدم بتخرب !
يا ألف مرحب .

متخافش من الكئيب لكن اترعب مـ الإبتسامه
المكتئب بيشوف جميع الناس غلبانه !
المبتسم يا اما بيتسَحب ويلدغك !
يا اما صادق فعلاً لكنه في الاخر بيلّبسك !
المبتسم بينصحك وكل همه تسمع
المكتئب بينصحك نصيحة واحد موّدع
كونك توصل لمرحله انك تقدر تفرق ..
يا ألف مرحب .

متخافش مـ اللي يطمنك ويدلك ع العمل !
لكن اترعب من اللي يرعبك من سكة الملل !
دي ناس بتسرق الأحلام بكام كلمة أمل !
ناقصك أمل ؟ وهو بيوعدك بفكرة الأمل ؟
مدام حياتك كركبت
طُرق النجاه اتكعبلت
لو حتي كان مؤقتاً
هتلقي كلمه تعجبك .. بتنصحك وتوعدك
وفي الأخر تلّبسك بإسم البحث ع الأمل .
لو انت مـ اللي جرابو في كل مره اتقالوا جرب !
يا ألف مرحب .

الخط في الأحلام تملي بيبقي مُستقيم
في الواقع نفس الخط بيتلوي شمال يمين
في الأصل الخط دايب وانت لسه شايفه متين
و إليك مثال بسيط .
وليكن محبوس في أوضه ضلمه لأكتر من سنه !
صرخت اترد ليك صداك !! صرخت تاني " مين "
اترد ليك سؤالك " مين "
هترد تقول " أنا " ..؟
يا ألف مرحب .

اللعب بالكلمات مش حاجه سهله ..
بداري جوه فكره ظاهره ليكم فكره تانيه ..
بغطي عورة جرحي عشان أخبيه مقدرش أعالجه !!
مفيش انسان مهما يكن طمني في يوم أصارحه !
محبوس في نفسي , مفيش غيره " أنا " اللي فهمني
خوفت منه في البدايه لكنه في الأخر صاحبني
مكنش مني غير اني أقوله .. يا ألف مرحب .



ــــــــــــــــــــــــــــــــــــ

عبدالرحمن سامي
14/5/2014

ــــــــــــــــــــــــــــــــــــ








إرسال تعليق
مازلت عايش في الحياه بكيفي