الأيام بترسمك | عبدالرحمن سامي








( 1 )

الأيام بتنحتك ..
بتجري وانت في مطرحك ..
أقل شئ بيخوفك ..
أقل ضربه تكسرك ..

متكتف بـ حبال دايبه ..
ربطاك مع انها سايبه ..
فرحة شبابك شايبه ..
قمة نجاحك خايبه ..

تعبك بدون مُقابل ..
مظلوم بس انت قابل ..
حتي الحقيقه , لو حكيت لها الحقيقه ,
هتقول عليك مُنافق ..
بطّل تكابر ..
انت أضعف مـ الظروف ..
بطّل تعاند ..
الصبر فيك مصدره الخوف ..
منتاش بطل , سبب بطولتك مش معروف ..
أحـلامك نايمه في حُفره ,
وانت بتردمها بـ جاروف .
( انت بتدفنك )


( 2 )

الأيام بتشكلك ..
وانت مستسلم لها ..
مسحت ملامحك ..
وانت مستسلم لها ..
بانت ملامح تانيه ياما خوفت مّنها ..
خطاويها داست فوق خطاويك فـ غيرتها كُلها ..
بدأت تغازلك ..
إختبرت صبرك ..
عِرفت إنك مش قوي , فـ قررت تزلك ..
وانت مستسلم لها .

الإحتمالات بتقول إنك ممكن تبقي سعيد ..
والمعطيات بتقول يقدر لكن طالبه المزيد ..
مزيد مـ الصبر
مزيد مـ الحب
مزيد مـ الجُرئه
مزيد مـ القوه
مزيد مـ الفُرقه
مزيد مـ العُزله
تلقي النتيجه تساوي مزيج ضد الهموم ..
منتاش بطل , سبب بطولتك مش مفهوم ..
أحلامك , كلمات علي وشك ,
وانت للأسف بتغسله كل يوم ..!!
( انت بتمسحك )


(3 )

الأيام بترسمك ..
والرسمه موبهمه ..
معانيها مؤلمه ..
ألوانها مضلمه ..
تلمح ملامحك لو ركزت مُعبره ..

نسمة صباح فيها ريحة الياسّمين ..
يسعد صباح .. الرسامين .



ـــــــــــــــــــــــــــــــــ

عبدالرحمن سامي

ـــــــــــــــــــــــــــــــــ





إرسال تعليق
مازلت عايش في الحياه بكيفي